“Реал” энг кўп даромад олувчи клублар рейтингида етакчига айланди

“Реал Мадрид” 2024-2025 йилги мавсумда энг кўп даромад олган футбол клублари рейтингида биринчи ўринни эгаллади. Бу ҳақда “Deloitte” компаниясининг ҳисоботида маълум қилинди.

Мадрид клуби ўтган мавсумда 1,16 миллиард евро даромад қайд этиб, кетма-кет иккинчи йил рейтингда етакчиликни сақлаб қолди. Таққослаш учун, жамоанинг 2023-2024 йилги мавсумдаги даромади 1,05 миллиард еврони ташкил этган эди.

Рейтингда иккинчи ўринни “Барселона” эгаллади. Каталонияликлар 974,8 миллион евро даромад билан 2019-2020 йилги мавсумдан бери илк бор кучли учликка қайтди. Учинчи поғонадан “Бавария” (860,6 миллион евро) жой олди. Тўртинчи ўринда эса “Пари Сен-Жермен” (837 миллион евро) қайд этилди.

“Ливерпуль” 836,1 миллион евро даромад билан бешинчи ўринни эгаллади ва тарихда илк бор рейтингда шунчалик юқори поғонага кўтарилган инглиз клубига айланди. Клубнинг саккизинчи ўриндан бешинчи ўринга кўтарилиши Чемпионлар лигасига қайтиши ҳамда тижорат даромадининг 7 фоизга ошгани билан изоҳланади.

Қайд этилишича, рейтингга киритилган 20 та клубнинг умумий даромади рекорд даражадаги 12,4 миллиард еврога етган. Бу кўрсаткич 2023-2024 йилги мавсумга нисбатан 11 фоизга кўпдир.