“Реал” ҳимояси катта муаммога дуч келмоқда

Мадриднинг “Реал” клубининг 32 ёшли австриялик ҳимоячиси Давид Алаба янги жароҳат олди. Бу ҳақда клуб матбуот хизмати хабар берди.

“Реал Мадрид” тиббий хизмати томонидан ўтказилган тестлардан сўнг, Давид Алаба чап соннинг қўшимча мушакларидан жароҳат олгани аниқланди. Клуб футболчининг текширувидан кейинги натижаларни кутмоқда”, дейилади клуб хабарида.

Маълумот учун, ҳимоячи 2023 йилнинг 18 декабрь куни хоч бўғимидан жароҳат олган эди. У умумий гуруҳга бир йилдан кўпроқ вақт ўтгач – 2024 йил 30 декабрда қайтди. Австриялик ҳимоячи Давид Алаба “Реал”га ўтишдан олдин “Бавария”да ўйнаган. У Австрия терма жамоаси учун ҳам муҳим футболчи ҳисобланади.

Қайд этиш жоиз, ҳозирга келиб “Реал”нинг фақатгина икки нафар номинал марказий ҳимоячиси жароҳат олмаган. Ҳозирда Рауль Асенсио ва Хесус Вальехода жароҳат йўқ. Алабадан олдин Антонио Рюдигер жароҳат олиб, сафдан чиққанди. Бразилиялик Эдер Милитао ҳам тикланиш жараёнларини бошдан ўтказмоқда.