Раисий ҳам Мирзиёевни қутлади

Ўзбекистон Республикаси Президенти Шавкат Мирзиёев ва Эрон Ислом Республикаси Президенти Иброҳим Раисий телефон орқали мулоқот қилди.

Суҳбат аввалида Эрон раҳбари Шавкат Мирзиёевни куни кеча Ўзбекистонда ўтган муддатидан илгари Президент сайловида ишончли ғалаба қозонгани билан самимий табриклаган.

Эрон Президенти ушбу мамлакатнинг Олий диний раҳбари Оятуллоҳ Сайид Али Хоманеийнинг саломи ва табрикларини ҳам етказган.

Шунингдек, етакчилар жорий йилнинг июнь ойида Эронга расмий ташриф якунида эришилган олий даражадаги келишувларни амалга ошириш масалаларини ҳам  кўриб чиққан.

Қабул қилинган “Йўл харитаси”га мувофиқ саноат кооперацияси лойиҳаларини амалга оширишга киришилгани мамнуният билан қайд этилган.

Бундан ташқари, икки мамлакат ишбилармон доиралари ва ҳудудлар маъмуриятлари даражасидаги алоқаларни давом эттириш муҳимлиги таъкидланган.

Минтақавий кун тартибидаги масалалар, жумладан, Шанхай ҳамкорлик ташкилоти ва Иқтисодий ҳамкорлик ташкилоти доирасидаги ҳамкорлик юзасидан ҳам фикр алмашилган.