Путиннинг Қора денгиз бўйидаги миллиард долларлик бункери ошкор қилинди

Россия Президенти Владимир Путиннинг Қора денгиз бўйидаги миллиард долларлик ҳашаматли бункери ошкор қилинди. Бу ҳақда “Business Insider” хабар берди. 

Қайд этилишича, Алексей Навальнийнинг жамоаси давлат раҳбарига тегишли барча қулайликларга эга бункер ҳақида маълум қилган. Бункер 190 минг квадрат/метр майдонни эгаллаган бўлиб, унинг ўз черкови, вино омбори ва казиноси ҳам бор. Унда, шунингдек, стриптиз трубаси билан жиҳозланган чилимхона, ботаника боғи ва Путин яқинлари билан ўйнашни хуш кўрадиган хоккей матчлари учун муз майдони ҳам мавжуд. Президентнинг шоҳона “дача”си 17 минг гектарлик ўрмонзор ва парвоз тақиқланган зона билан ҳимояланган. 

Президентнинг ҳашаматли саройи остидаги ерости мажмуасига 50 метр чуқурликка олиб тушувчи лифтлар билан боғланган икки туннель орқали етиш мумкин. Бункер унинг обрўли меҳмонларини бир неча кун ёки ҳафталар давомида тоза ичимлик суви, вентиляция ҳамда зарур қулайликлар билан таъминлаши мумкин. 

“Путин Россиянинг бутунлай қонуний бўлмаган раҳбари бўлиб қолишидан жуда хавотирда. Шунинг учун, у ўзининг легитимлиги сайловлар воситасида тўлиқ таъминланмаганини билиб, яхши ҳимояланган турар жой мажмуаси орқали шахсий хавфсизлигини максимал даражада оширишга интилади”, дейди Россия ва Украина сиёсати билан шуғулланган АҚШ Давлат департаментининг собиқ ходими Майкл Киммаге.

Путин саройининг махсус чиқиш жойларини соҳил бўйидаги қояларда кўриш мумкин. 

Ядровий давлатларнинг барча раҳбарлари фавқулодда вазиятлар учун ўз режаларини тузади. Масалан, АҚШ Президентининг Оқ уй остида фавқулодда бункери ва Виржиниядаги Mount Wheather фавқулодда операциялар маркази бор. Аммо Путиннинг саройи ундан фарқли ўлароқ хусусий субъект томонидан молиялаштирилган ва ундан бирор тузумни эмас, кўпроқ алоҳида шахснинг ҳаётини сақлаб қолиш мақсади кўзланган. 

Махфий мажмуанинг қурилишига ҳозирда тугатилган Metro Style пудратчи ташкилоти бошчилик қилган ҳамда унинг расмий веб-сайтларида 2010 йил саройнинг чизмалари ҳам намойиш қилинган. 

Мажмуанинг 40 ва 60 метрли икки туннели 6 метр кенгликда бўлиб, умумий 6500 квадрат/метрлик потенциал яшаш майдонини ҳосил қилади. Туннелларни 38 сантиметрли бетон қобиқ ўраб туради. Бу ҳудудни ҳар қандай ядровий портлашдан сақлайди. 

Мажмуани қурган компания ҳам, Путиннинг матбуот котиби Песков ҳам бу сарой бўйича изоҳ беришдан бош тортган. 2021 йилда Навальний гуруҳининг тафтишлари натижаси ўлароқ эълон қилинган Путиннинг қасри ҳақидаги видео оммавий норозиликларга сабаб бўлганидан сўнг Президент унга эгалик қилишини рад этганди. 

Metro Style компаниясига ўтган асрнинг 90-йилларида уч киши томонидан асос солинган бўлиб, у Россиядаги кўплаб лойиҳалар, хусусан, Москва метросининг туннелларини қазишга ҳам жалб қилинган. Компания 2010 йилда ўз саҳифасида туннель чизмаларини жойлаштирганда унинг айнан Путинга тегишли эканини очиқламаган. Бунинг ўрнига лойиҳа “Краснодар ўлкасининг Геленджик шаҳридаги панционат учун эрости иншоотлари мажмуаси” сифатида қайд этилган. Геленджик сарой мажмуасига энг яқин шаҳар бўлиб, Сочидан 5 соатлик йўлда жойлашган. 

Путин Москвадан бунчалик узоқда яширин жой ҳозирлатишига сабаб ўз хавфсизлигини юқори даражада таъминлашни ўйлагани экани айтилмоқда.