Путин сулҳга рози бўлса, Украинада сайловлар ўтказилади – Зеленский

Украина Президенти Владимир Зеленский агар Россия Президенти Владимир Путин 60 кунлик сулҳга рози бўлса, Украинада сайловлар ўтказилишини маълум қилди. Бу ҳақда у ABC News журналисти Жонатан Карлга берган интервьюсида сўз очди.

Зеленскийнинг сўзларига кўра, қачон овоз бериш ва кимни сайлашни украинларнинг ўзи ҳал қилиши керак.

“Аммо бу саволга жавоб берадиган бўлсам, шуни биламанки, Путин Украина президентини алмаштиришни жуда хоҳлаган эди. Мен буни тушунаман. Агар Президент Трамп ҳақиқатан ҳам сайловлар орқали қандайдир ўзгаришларни хоҳлаётган бўлса, мен буни аллақачон унинг жамоаси билан муҳокама қилганман. Шунинг учун, илтимос, Путинга етказинг: бизга икки ой, 60 кунлик нафас ростлаш имконини беринг. 60 кунга тўлиқ ўт очишни тўхтатиш ва биз сайловларни ташкил қиламиз. Албатта, биз халқимизнинг — айнан Украина халқининг ҳар қандай танловини қабул қилишга тайёр бўламиз”, дейди у.

Эслатиб ўтамиз, аввалроқ Трамп журналистлар билан суҳбатда Украинага “келишув туза оладиган янги президент танлашни” таклиф қилган эди.

“Биласизми, мен нимани таклиф қиламан? Мен уларга [украинларга] келишувлар тузишга қодир бўлган янги етакчи топишни таклиф қиламан — ахир у [Владимир Зеленский] жуда кўп келишувлар тузиши мумкин эди, лекин нимагадир ҳеч қачон буни қилмайди”, деган эди Трамп.

У, шунингдек, Зеленскийни Россиянинг нефтни қайта ишлаш заводларига (НҚИЗ) берилган зарбалар учун танқид қилган. Трампнинг сўзларига кўра, АҚШ Зеленскийга Россия билан “хоҳлаган ишини қилиши мумкинлигини”, лекин нефтни қайта ишлаш заводларига зарба бермаслиги кераклигини айтган, чунки бу “дунё миқёсидаги муаммо”. Эртаси куни Зеленский Киев Россия НҚИЗларига ҳужум қилишни фақат Москва Украина энергетикасига бераётган зарбаларини тўхтатсагина бас қилишини билдирди.

11 октябрь куни Трамп Россия ва Украина ўртасида энергетик сулҳ бошланганини эълон қилди. Зеленский аввалига бундай келишув ҳақида биринчи марта эшитаётганини айтди.

“Агар Президент Трамп бу ҳақда Путин билан келишиб олган бўлса, илтимос, сулҳ қачон кучга киришини бизга хабар қилинг”, деди у.

Кейинчалик у Киевнинг Россия энергетика инфратузилмасига зарба беришни тўхтатишга тайёрлигини тасдиқлади. Унинг сўзларига кўра, Украина Қуролли Кучлари аллақачон тегишли буйруқларни олган.