Путин йил охиригача Украинанинг 4 та вилоятини босиб олмоқчи

north_east

Россия ва Украина Истанбулда нималарга келишиб олди?

north_east

Европа етакчилари Путин билан гаплашиши кутилаётган Трампга қўнғироқ қилди

Россия Президенти Владимир Путин россиялик қўшинлар йил охиригача Украина Қуролли Кучларининг мудофаасини бузиб ўтиб, Украинанинг тўртта вилояти – Донецк, Луганск, Херсон ва Запорожьени тўлиқ қўлга кирита олишига ишончи комил. Бу ҳақда бугун, 19 май куни хабардор манбасига таяниб, “Bloomberg” хабар берди.

Агентлик манбасига кўра, Путин АҚШ Президенти Дональд Трамп билан бўлажак суҳбатида Москва  уруш  бошланганидан кўп ўтмай аннексия қилинганини эълон қилган Украинанинг ушбу тўртта ҳудуди устидан Россия назоратни тўлиқ ўз қўлига олиши мумкинлигига бўлган ишончига асосланади.

Шу билан бирга, Халқаро стратегик тадқиқотлар институти таҳлилчиси Бен Баррининг фикрича, Россия йил охиригача Донбасс, Запорожье ва Херсон вилоятларини тўлиқ қўлга киритиши эҳтимоли ниҳоятда паст.

“Агар Украина Қуролли Кучларининг мудофааси қулаб тушса, ўшанда бу ҳудудларни эгаллаш оддий иш бўлади, аммо ҳозир бундай сценарий жуда даргумон кўринади”, деди у “Bloomberg”га. 

“Bloomberg”нинг қайд этишича, Трамп урушни тезда тугатишга умид қилмоқда, Путин эса, ўз навбатида, жангларни тўхтатишга тайёрлик аломатларини кўрсатмаяпти. Агентлик манбасининг фикрича, Россия Президенти АҚШнинг Россияга қарши санкцияларни кучайтириш ҳақидаги таҳдидларига ҳам хотиржам.

Трамп аввалроқ, агар Путин Украинада 30 кунлик оташкесимга рози бўлмаса, Россияга нисбатан чекловларни кучайтиришга тайёрлигини билдирган эди.

Шу билан бирга, “Bloomberg” Россия ўт очишни тўхтатмаганини, Америка санкцияларининг янги пакети ҳали қабул қилинмаганини таъкидлайди.

Путин ва Трамп ўртасидаги телефон мулоқоти бугун, 19 майга режалаштирилган. Оқ уй расмийлари ва Трампнинг ўзи АҚШ ва Россия Президентлари ўртасида шахсий учрашув бўлиб ўтиши мумкинлигини айтган, бироқ у ҳозирча белгиланмаган. Трамп, шунингдек, Путин билан учрашмагунча, Украина тинчлик музокараларида ҳеч қандай ютуқ бўлмаслигини айтган.

Эслатиб ўтамиз, “The Economist” мухбири Оливер Керолл 16 май куни Истанбулда бўлиб ўтган Россия-Украина музокараларида Россия Украина қўшинларини Луганск, Донецк, Херсон ва Запорожье вилоятларидан олиб чиқиб кетишни талаб қилгани, шунингдек, Украинанинг Харьков ва Суми вилоятларини ҳам босиб олиш билан таҳдид қилгани ҳақида хабар берганди.