Путин урушни тугатмоқчи

Россия Президенти Владимир Путин Украинадаги урушни жорий йилнинг охиригача ўзи “ғалаба” деб ҳисоблайдиган шартлар асосида якунлашни истамоқда. Бу ҳақда “Bloomberg” хабар берди.

Маълумотига кўра, Кремль раҳбари Донбасс устидан тўлиқ назорат ўрнатиш ҳамда Европа билан Россиянинг ҳудудий ютуқларини амалда тан оладиган хавфсизлик келишувига эришишни мақсад қилган.

Кремлдаги айрим юқори мартабали амалдорлар уруш боши берк кўчага кириб қолганини ва уни тугатишнинг аниқ йўли йўқлигини тан олмоқда. Шунингдек, Россия элитасининг айрим вакиллари Украина томонидан фронтдан узоқда жойлашган Россия шаҳарларига уюштирилаётган зарбалар сабаб жамиятда салбий кайфият ва урушдан чарчаш кучайганини билдирган.

Қайд этилишича, Украина дронларининг Россия ҳудуди ичкарисидаги нишонларга, айниқса нефтьни қайта ишлаш заводларига берган зарбалари россияликлар орасида урушдан чарчаш кайфиятини кучайтирган.

Бироқ Кремль матбуот котиби Дмитрий Песковнинг айтишича, Путин урушни тугатиш учун ҳеч қандай аниқ муддат белгиламаган.