Путин урушни 2027 йилгача давом эттира олади – НАТО

Россия Украинадаги ҳозирги даражадаги ҳарбий ҳаракатларни камида 2027 йилгача давом эттира олади. Бу ҳақда разведка маълумотларига таяниб, Гаагада ўтаётган НАТО саммитида маълум қилинди.

Қайд этилишича, Россия иқтисодиёти ички қийинчиликларга қарамай, урушни яна бир неча йил давомида молиялаштира олади. Бироқ НАТО, шунингдек, Россиянинг мудофаа-саноат комплекси аллақачон ўз имкониятининг энг юқори даражасида ишлаётгани ва қурол ишлаб чиқариш ҳажмини бундан ортиқ ошириб бўлмаслигини маълум қилган.

Шу билан бирга, НАТОдаги юқори мартабали амалдорлардан бири BBC билан суҳбатда Ғарб дипломатик саъй-ҳаракатлари ҳали Украинадаги можаро тугашига яқинлашишга олиб келмаганини эслатган. Унинг сўзларига кўра, Владимир Путин фақат қисқа муддатли келишувларга қизиқмоқда – бу келишувлар Москвага танаффус олиш ва эгаллаб олинган ҳудудлар устидан назоратни сақлаб қолиш имконини беради. НАТОга кўра, Путин урушда ғалаба қозонаётганига ишонади. Альянс эса бу ишончни Кремлга Россия разведка хизматлари томонидан тақдим этилаётган нотўғри манзара натижаси, деб ҳисоблайди.

BBC манбасига кўра, Украина армиясида кадрлар танқислиги мавжуд.

“Бу қанчалик жиддий экани Украинанинг бу борада нима қилишига боғлиқ. У аниқ чораларни кўриши керак”, деган альянс вакили.

Бунгача АҚШдаги Урушларни ўрганиш институти (ISW) таҳлилчиси Жорж Баррос Россия урушни ҳозирги кўринишида яна 12 дан 16 ойгача давом эттира олишини билдирган. Унинг фикрича, шундан сўнг Кремлда ҳам бюджет маблағлари, ҳам инсон ресурси, жумладан, ҳозирда катта тўловлар билан урушга жалб қилинаётган “кўнгиллилар” тугаши мумкин.

Эслатиб ўтамиз, аввалроқ Россия НАТО давлатларига қарши урушга икки йилдан беш йилгача муддатда тайёр бўлиши ва бу уруш жаҳон иқтисодиётига 1,5 трлн долларга тушиши мумкинлиги хабар қилинган эди.