Путин Тўқаевнинг урушни “музлатиш” таклифини рад этди

Россия Президенти Владимир Путин Қозоғистон Президенти Қосим-Жомарт Тўқаевнинг Украинадаги урушни “музлатиш” ҳақидаги таклифига жавобан ҳарбий ҳаракатлар фақат Россия томонидан қўйилган мақсадларга эришилганидан кейингина тўхтатилишини айтди. Бу ҳақда Кремль матбуот котиби Дмитрий Песков маълум қилди.

Песковнинг сўзларига кўра, Путин таклифга жавобан Тўқаевга “махсус ҳарбий операция ҳақида ҳаммасини батафсил айтиб берган”. Кремль вакили, шунингдек, Киевнинг позициясини ҳисобга олган ҳолда “музлатиб қўйишнинг имкони йўқлигини” билдирган.

“Биз учун энг асосий шарт бор – биз ўз мақсадларимизга эришишимиз керак”, дейди Песков.

Унинг қўшимча қилишича, ҳарбий ҳаракатларни тўхтатиш шартлари Россия ТИВ томонидан икки йил олдин баён қилинган ва уларнинг сўзларига кўра, агар Украина расмийлари тегишли қарорларни қабул қилса, уруш “бугун кун охиригача тўхташи мумкин”.

Эслатиб ўтамиз, аввалроқ Омскдаги учрашувда Тўқаев урушни “музлатиб қўйиш”ни, “Истанбул формуласи 2.0”га қайтишни ва “буюк давлатлар”, жумладан, Россия кафолати остида тинч йўл билан ҳал этиш сари ҳаракатни давом эттиришни таклиф қилган эди.