Тўқаев Путинга Украинадаги урушни музлатиб қўйишни таклиф қилди

Бугун, 25 июль куни Қозоғистон Президенти Қосим-Жомарт Тўқаев Омскда Россия Президенти Владимир Путин билан учрашди. Учрашувда Тўқаев Путинга Украинадаги низони музлатиб қўйишни таклиф қилди. Бу ҳақда Оқўрда матбуот хизмати хабар берди.

Қайд этилишича, Қозоғистон раҳбари Россия ва Украина ўртасидаги низони ҳал этиш масаласи бўйича ўз позициясини билдирган. 

“Биласизми, мен энг бошиданоқ бу давлатлараро низо эканини айтган эдим. Гап бирор-бир фуқаролар уруши ҳақида кетаётгани йўқ. Биз ҳар доим Украина халқига, унинг маданияти ва тилига ҳурмат билан муносабатда бўлганмиз. Ва ушбу низонинг табиати кўплаб одамлар, жумладан, биз учун ҳам унчалик тушунарли эмас деб ҳисоблаймиз. Мен Аляскадаги Анкориж учрашувида сиз максимал даражада дипломатик мослашувчанлик кўрсатганингизни биламан. Ва шунчаки менинг камторона фикрим, модомики менга мурожаат қилишаётган экан: балки бу низони аллақачон музлатиб қўйиш ва “Истанбул формуласи 2.0”га қайтиш керакдир, чунки у ерда салмоқли натижаларга эришилган эди.

Кейин эса, табиийки, буюк давлатларнинг, жумладан, Россиянинг кафолати остида узоқ кутилган тинчлик сари олға ҳаракат қилиш керакдир. Қозоғистон – четда турган мамлакат эмас, лекин шу билан бирга, барча таклифлар ва чақириқларга қарамай, мен воситачи бўлишни қатъиян рад этаман, чунки Россия – буюк мамлакат, рус халқи эса буюк халқ эканини биламан. Ва, айтишганидек, воситачиларсиз у кун тартибида турган сиёсий ва бошқа масалаларни ўзи ҳал қила олади. Лекин ўз камторона фикримни айнан бугун билдиришга қарор қилдим, чунки одамлар менинг Омскда бўлишни режалаштирганимни ва учрашувимизни билишади.

Ҳеч ким бу вазиятдан қандай чиқишни билмайди, чунки томонларнинг ўз позициялари бор. Лекин, бошқа томондан, бу ишларнинг барчасини музлатиб қўйиш имконияти мавжуд. Бу халқаро амалиётда синалган вазият ва усулдир. Чунки, албатта, ёшларнинг ҳалок бўлаётгани ачинарли. Бу Россия ва Украинанинг қардош халқлари генофондидир. Ва буларнинг барчасини тўхтатиш керак, чунки содир бўлаётган воқеалар, менинг қатъий ишончим бўйича, Россия ва Украина давлатининг ғанимларига қўл келади ва уларни қувонтиради”, дейди Қосим-Жомарт Тўқаев.

Якунда Қозоғистон раҳбари Россия билан стратегик шериклик ва иттифоқчиликка содиқлигини тасдиқлаган.

“Қозоғистоннинг Россияга нисбатан позициясига келсак, шубҳаланманг, биз ҳар доим Россияни буюк давлат деб ҳисоблаганмиз ва ҳисоблаймиз. Бу ҳақда мен барча халқаро форумларда айтмоқдаман. Қанчалик қийин бўлмасин, биз Россия билан стратегик ҳамкорликка, иттифоқчилик муносабатларига содиқмиз ва мана шу бугунги Форум ҳам бунинг исботидир”, дейди Тўқаев.

Қайд этиш жоиз, бугун Қозоғистон Президенти Қосим-Жомарт Тўқаев Қозоғистон ва Россия XXII Ҳудудлараро ҳамкорлик форумида иштирок этиш учун Омскга ташриф буюрди.