Путин Трампга сигнал берди – Песков

Россия Президенти Владимир Путин кеча, 13 март куни кечқурун Америка махсус вакили Стив Уиткоффни қабул қилди ва у орқали АҚШ Президенти Дональд Трамп учун маълумот ва “қўшимча сигналлар”ни етказди.  Бу ҳақда Россия раҳбарининг матбуот котиби Дмитрий Песков бугун, 14 март куни матбуот билан мулоқот чоғида маълум қилди.

Кремль вакилининг сўзларига кўра, Россия ва АҚШда мамлакат Президентларининг суҳбати зарурлиги ҳақида тушунча бор.

“У (Уиткофф) кеча шу ерда эди, кеча кечқурун у Президент Путин томонидан қабул қилинди. Россия томонига қўшимча маълумотлар тақдим этилди. Ва, шунингдек, Путиннинг ўзи Уиткофф орқали Президент Трамп учун маълумот ва қўшимча сигналларни етказди”, деган Песков.

Маълумот учун, Стив  Уиткофф кеча, 13 март куни Жиддадаги Украина ва АҚШ музокараларидан икки кун ўтиб, Москвага етиб келди.  Музокаралардан сўнг Киев АҚШнинг 30 кунлик ўт очишни тўхтатиш таклифига рози бўлди. Ушбу таклифни Россия томони билан ҳам муҳокама қилиш режалаштирилган эди. Владимир Путин ва Стив Уиткоффнинг музокаралари ёпиқ тарзда ўтди. АҚШ вакилининг самолёти бугун, 14 март куни эрталаб Москвадан учиб кетган.

Дональд Трампнинг махсус вакили билан учрашувдан олдин Владимир Путин Россия Украинада ўт очишни тўхтатиш таклифига розилигини, бироқ бу узоқ муддатли тинчликка олиб келишини айтди. Унинг сўзларига кўра, бир нечта нюансларни ҳисобга олиш керак, жумладан, ўт очишни тўхтатиш режимининг сақланишини кафолатлаш масаласи.