Путин Трамп билан учрашуви нега қолдирилганини айтди

АҚШ Президенти Дональд Трамп билан Будапештда ўтказилиши режалашритилган учрашув бекор қилинмади, аксинча, кейинроққа сурилди. Бу ҳақда Россия Президенти Владимир Путин журналистларнинг саволларига йўллаган жавобида айтиб ўтди.

Россия раҳбарининг сўзларига кўра, бошиданоқ учрашув АҚШ томонидан таклиф қилинган ва уни кейинга қолдириш ҳам Оқ уйнинг қарори. 

“Сўнгги телефон суҳбатимизда учрашувнинг ўзи ҳам, унинг ўтказилиш жойи ҳам Америка томонидан таклиф қилинган эди ва мен бунга рози бўлдим, бу масала бўйича фикрларимни билдирдим ва албатта, бундай учрашувларга пухта тайёргарлик кўриш кераклигини айтдим. Бунга енгил ёндашиш ва бу учрашувни натижасиз қолдириш мен учун ҳам, Америка Президенти учун ҳам хато бўлади”, деган Кремль раҳбари. 

Путин, шунингдек, журналистларнинг саволларига жавоб берар экан, АҚШ ва Европа томонидан Россияга қарши жорий этилган янги санкциялар ҳақида ҳам фикр билдирган. Унинг таъкидлашича, чекловлар “мамлакатнинг иқтисодий фаровонлигига сезиларли таъсир кўрсатмайди”. Путин санкцияларни Россияга босим ўтказишга уриниш деб атаган.

“Ўзини ҳурмат қиладиган бирор бир мамлакат ҳеч қачон босим остида бирор нарсага қарор қилмайди”, дея қўшимча қилган у.

Шунингдек, Путин Владимир Зеленскийнинг Украина узоқ масофали қуролларни олиши ҳақидаги баёнотини вазиятни кескинлаштиришга уриниш деб атаган.

“Агар бундай қуроллар Россия ҳудудига зарба бериш учун ишлатилса, жавоб жуда жиддий бўлади. Улар бу ҳақда ўйлаб кўрсин”, деган Путин. 

Эслатиб ўтамиз, аввалроқ Трамп НАТО Бош котиби Марк Рютте билан учрашувда Россия Президенти Владимир Путин билан Будапештда бўладиган учрашувни бекор қилганини айтганди.

“Биз Путин билан учрашувни бекор қилдик. Менга шундай таассурот пайдо бўлди-ки, бу нотўғри. Менга шундай туюлди-ки, биз етишимиз керак бўлган нуқтага етолмаймиз. Шунинг учун учрашувни бекор қилдим. Аммо келажакда бу амалга оширилади”, деган Оқ уй раҳбари.