Путин Россия ишчи кучига муҳтожлигини айтди

Россия ишчи кучига муҳтож, мамлакат эса унинг “кераклиги” ва хориждан келаётганларнинг қонунга риоя этишидан манфаатдор. Бу ҳақда Президент Владимир Путин Душанбеда журналистларга берган интервьюсида айтди.

“Россия ўз ишчи кучидан манфаатдор, лекин у бизнинг эҳтиёжларимизни қондириши ҳам муҳим. Қолаверса, одамлар муносиб шароитда яшаши, қонун ва қоидаларимизга риоя қилиши шарт. Мен ҳар доим улар қонунга итоаткор бўлиши кераклигини таъкидлайман”, деди у.

Путин бу соҳада муаммолар борлигини ҳам таъкидлади.

“Уларнинг кўпи бор — Россия фуқаролари уларга ишора қилмоқда. Биз биринчи навбатда ватандошларимиз ҳақида ўйлашимиз керак”, дея қўшимча қилди Россия Президенти.

Путин Тожикистонда бўлиб ўтган “Марказий Осиё-Россия” саммити ва МДҲ Давлат раҳбарлари кенгаши йиғилишида иштирок этди.

Шунингдек, у бир қатор икки томонлама учрашувлар ўтказди.

Эслатиб ўтамиз, аввалроқ Европа Иттифоқи Россия Президенти Владимир Путинни ҳибсга олмагани учун Тожикистонни Халқаро жиноий суд талабларини бажармаганликда айблаганди.