Путин Пасха муносабати билан сулҳ эълон қилди

Россия Президенти Владимир Путин Пасха байрами муносабати билан вақтинчалик ўт очишни тўхтатиш режимини эълон қилди. Бу ҳақда Кремль хабар берди.

Маълум қилинишича, сулҳ 11 апрель куни соат 16:00 дан бошланиб, 12 апрель куни кун охиригача давом этади. Ушбу даврда Россия қўшинларига барча йўналишларда ҳарбий ҳаракатларни тўхтатиш топширилган.

Шу билан бирга, Мудофаа вазири Андрей Белоусов ва Бош штаб бошлиғи Валерий Герасимовга тегишли кўрсатмалар берилган.

Кремль Россия томони Украина ҳам бу ташаббусга қўшилишига умид қилаётганини билдирган. Шу билан бирга, ҳарбийларга эҳтимолий провокацияларга жавоб қайтаришга тайёр туриш топширилган.

Эслатиб ўтамиз, аввалроқ Украина Президенти Владимир Зеленский ҳам Пасха муносабати билан вақтинчалик сулҳ эълон қилиш ташаббуси билан чиққан эди. Бироқ, Россия Владимир Зеленскийнинг сўзларида Пасха байрами учун ўт очишни тўхтатиш бўйича аниқ шакллантирилган таклифни кўрмаган ва сулҳни қабул қилмаган.

Маълумот учун, 2026 йилда православ Пасха байрами 12 апрелга тўғри келади (ғарбий христианларда эса 5 апрель куни нишонланган).