Путин Киевга зарбаларни 3 кунга тўхтатишни буюрди (аудио)

Россия Президенти Владимир Путин Киевга 3 кун давомида зарба беришни тўхтатиш бўйича топшириқ берди. Бу ҳақда Кремль вакили Дмитрий Песков маълум қилди.

“Бу америкаликларнинг Киевдаги учрашувларини тайёрлаш ва ўтказиш билан боғлиқ”, дея тушунтирган у.

Қайд этилишича, бугун, 5 сентябрь куни Путин Москвага етиб келган АҚШ вакиллари Стив Уиткофф ва Жаред Кушнер билан музокаралар ўтказади.

Песковнинг сўзларига кўра, ташрифда АҚШ Президенти Дональд Трамп айтганидек, Украина масаласини ҳал қилиш бўйича янги ғоялар ҳақида гап кетмаяпти. У, шунингдек, прогнозлар қилишга шошилмаслик ва учрашувни кутишни тавсия қилган.

Аввалроқ, АҚШ Президенти Дональд Трамп ўз вакиллари Москвага ташрифи давомида Украинадаги можарони тўхтатиш бўйича таклифни тақдим этишини айтган эди. Бироқ у ташаббус тафсилотларини ошкор қилмаган.

Жорий йилнинг 1 сентябрь куни Путин Москва мулоқот қилишни истаган барча томонлар билан музокарага очиқ эканини таъкидлаган. Россия Президенти АҚШ Президентининг вакиллари Кремль учун доимо хуш келиб, улар билан ҳамкорлик қилишдан мамнун эканини билдирган.

Эслатиб ўтамиз, АҚШ Президенти Дональд Трампнинг махсус вакили Стив Уиткофф ва куёви Жаред Кушнер жорий йилнинг 5–6 сентябрь кунлари Москвага, шундан сўнг Киевга бориши мумкинлиги ҳақида хабар берилган эди. Шундан сўнг, АҚШ Президенти Дональд Трамп улар Россия ва Украина ўртасидаги урушни якунлаш бўйича тинчлик келишувига эришиш учун хорижга йўл олишини маълум қилган. Бугун, 5 сентябрь куни Стив Уиткофф ва Жаред Кушнер Москвага етиб борган.