Путин келаси йил Эронга бориши мумкин 

Россия Президенти Владимир Путин 2026 йилда Эронга ташриф буюриши мумкин. Бу ҳақда Эроннинг Москвадаги элчиси Козим Жалолий SNN агентлигига берган интервьюсида маълум қилди.

Унинг сўзларига кўра, ҳозирча яқин ойларда Путиннинг Эрон сафарига оид режалари йўқ, бироқ бу ташриф 2026 йил ёзида, Эрон мезбонлик қиладиган Каспий саммити чоғида амалга ошиши мумкин.

“Ҳозирча жаноб Путиннинг Эрон сафарига оид режалари йўқ. 2026 йилги Каспий саммитини Эронда ўтказиш таклифи илгари сурилган. Агар саммитни ўтказиш иштирокчи давлатлар томонидан маъқулланса, жаноб Путиннинг сафарини келаси йил июль-август ойларида амалга ошириш мумкин бўлади”, дейди Жалолий.

Қайд этиш жоиз, 2025 йил май ойи ўрталарида Эрон ҳукумати расмий вакили Фотима Моҳажерани РИА Новости нашрига берган интервьюсида Теҳрон Путиннинг ташрифига тайёргарлик кўраётганини билдирган. Ўша пайтда Россия Президенти матбуот котиби Дмитрий Песков Путиннинг Эрон сафарининг аниқ саналари ҳали келишилмаганини, аммо у мамлакатга ташриф буюриш учун амалдаги таклифга эга эканини қайд этган.

Эслатиб ўтамиз, Владимир Путин охирги марта 2022 йилнинг июнь ойида “Остона жараёни” саммитида иштирок этиш учун Эрон пойтахти Теҳронга борганди. Путин ушбу ташрифи чоғида мамлакат олий раҳбари Оятуллоҳ Али Хоманаий ва Туркия Республикаси Президенти Ражаб Тойиб Эрдўған билан яккама-якка учрашувлар ўтказган.