Путин Қорабоғдаги вазиятда бу сафар кимни қўллаши маълум бўлди

Россия Қорабоғдаги қуролли тўқнашувларга “Озарбайжон ўз ҳудудида операция ўтказмоқда” деб қарайди. Чунки Арманистон 1991 йил чегаралари доирасида Тоғли Қорабоғни Озарбайжоннинг ажралмас қисми сифатида тан олган. Бу ҳақда журналистларга Россия Президенти матбуот котиби Дмитрий Песков маълум қилди. 

“Де-юре, ҳозир гап Озарбайжон Республикасининг ўз ҳудудидаги ҳаракатлари ҳақида бормоқда”, дейди Кремль вакили.  

Унинг эслатишича, аввалроқ Арманистон Бош вазири Никол Пашинян 1991 йилда Озарбайжон чегаралари тан олинишини эълон қилган.  

“Бу Арманистон томони Қорабоғни Озарбайжон ҳудудининг ажралмас қисми, Озарбайжон ҳудуди сифатида тан олганини англатади”, дейди Песков. 

Шунингдек, унинг қўшимча қилишича, Россия Қорабоғдаги тинчликпарвар кучларнинг фаолияти учун танбеҳларни қабул қилмайди, бу айбловлар асоссиз. 

“Бизга қарши бундай айбловлар мутлақо асоссиз. Улар ҳеч нарсага асосланмаган. Шунга қарамай, биз арман томони билан алоқаларимизни давом эттирмоқдамиз. Арманистон бизнинг жуда муҳим иттифоқчимиз, ҳамкоримиз, бизга яқин давлат бўлган ва шундай бўлиб қолади. Биз Озарбайжон билан ҳам алоқаларни давом эттирмоқдамиз, у ҳам бизнинг жуда муҳим ҳамкоримиз. Қорабоғдаги арманлар билан алоқаларимизни давом эттирмоқдамиз”, дейди у Арманистон Хавфсизлик Кенгаши котиби Арман Григоряннинг Россия тинчликпарвар кучлари ўз мажбуриятларини бажармаётгани ҳақидаги сўзларига изоҳ берар экан.

Унинг билдиришича, Москва Россия Президенти Владимир Путин ва Арманистон Бош вазири Никол Пашинян ўртасидаги телефон мулоқоти вақти бўйича келишувни кутмоқда. Озарбайжон Президенти Илҳом Алиев билан алоқалар ҳозирча йўқ, лекин зарурат туғилганда амалга оширилади. 

“Президент Путин ва Бош вазир Пашинян ўртасидаги телефон мулоқоти вақти бўйича келишувни кутмоқдамиз. Бу суҳбат бўлиши биланоқ сизга хабар берамиз”, дейди Песков. 

Эслатиб ўтамиз, олдинроқ Озарбайжон Мудофаа вазирлиги Қорабоғда “Озарбайжон Республикасининг конституциявий тузумини тиклаш мақсадида” маҳаллий аксилтеррор чоралари бошланганини эълон қилганди. Баку тинч аҳоли ва фуқаролик инфратузилмаси нишон эмаслигини таъкидлаганди. Кейинчалик Озарбайжон Мудофаа вазирлиги хавфли ҳудуддан аҳолини эвакуация қилиш учун гуманитар йўлаклар ва қабул пунктлари яратилганини билдирган. Воқеалар фонида Арманистон Бош вазири Никол Пашинян Хавфсизлик кенгаши йиғилишини ўтказиб, (тан олинмаган) Тоғли Қорабоғдаги вазиятни муҳокама қилган. Мажлисдан сўнг, Пашинян Арманистон Озарбайжоннинг Қорабоғ ҳудудидаги ҳарбий амалиётларда қатнашишни режалаштирмаётганини маълум қилди. Франция эса БМТ Хавфсизлик кенгашининг Тоғли Қорабоғдаги вазият бўйича фавқулодда йиғилишини талаб қилди. Туркия Президенти Ражаб Тойиб Эрдўған БМТ Бош Ассамблеясининг 78-сессиясида Озарбайжоннинг (тан олинмаган) Тоғли Қорабоғдаги ҳаракатларини қўллаб-қувватлашини билдирди. 

АҚШ Давлат котиби Энтони Блинкен Озарбайжон Президенти Илҳом Алиев ва Арманистон Бош вазири Никол Пашинян билан телефон орқали мулоқот қилиб, томонларни музокаралар столига чақирди. 20 сентябрга келиб Озарбайжон Мудофаа вазирлиги маълум шартлари асосида аксилтеррор ҳаракатлари тўхтатилганини эълон қилди.