ПСЖ учун қоронғу кеча: Луис Энрике жароҳат олди, Дембеле яна муаммода

Кеча, 5 сентябрь куни ПСЖ Бош мураббийи Луис Энрике велосипеддан йиқилиб, елкасини синдириб олди. Шунингдек, жамоанинг франциялик футболчиси Усмон Дембеле терма жамоа таркибида Украина билан бўлиб ўтган ўйинда жароҳат олди. Бу ҳақда “Reuters” хабар берди.

Нашрнинг ёзишича, 54 ёшли испаниялик мутахассис ҳодисадан кейин тез ёрдам хизмати томонидан олиб кетилган. ПСЖ ҳозирча унинг даволаниши учун қанча муддат кетиши ҳақида маълумот бермади.

“Пари Сен-Жермен Луис Энрикени тўлиқ қўллаб-қувватлашини билдиради ва унинг тезроқ тузалиб кетишини тилайди. Клуб тез орада қўшимча маълумот беради”, дея баёнот берган клуб.

Қолаверса, кеча, 5 сентябрь куни Усмон Дембеле Франция миллий терма жамоаси сафида Украина билан бўлиб ўтган Жаҳон чемпионати саралаш ўйинида ўзини ёмон ҳис қилиб майдонни тарк этди. МТЖ бош мураббийи Дидье Дешам уни соннинг орқа қисми оғриғидан азият чекаётгани сабабли захирага олгани маълум бўлди. Хабарларга кўра, клуб шифокорлари Дембеленинг ўнг оёғида муаммо борлиги учун уни чет эл сафарига чиқмаслиги кераклиги ҳақида терма жамоани олдиндан огоҳлантирган. Шу сабаб ПСЖ Франция футбол федерацияси ҳамда Дешамга қарши жиддий норозилик билдирган.

Эслатиб ўтамиз, жорий 13 август куни “Пари Сен-Жермен” Англиянинг “Тоттенхэм” клубини мағлуб этиб, 2025 йилги UEFA Суперкубогига эга чиққан эди.

Жаҳонгир Болтабоев