Пригожиннинг қаердалигини билмайман – Песков
Олам
−
29 Июнь 2023
7739Россия Президентининг матбуот котиби Дмитрий Песков Евгений Пригожиннинг қаерда эканлиги ҳақида ҳеч қандай маълумотга эга эмаслигини айтди. У бу ҳақда бугун, 29 июнь куни Кремлда журналистлар билан “Вагнер” атрофидаги вазият тўғрисидаги ўтказган брифингида айтиб ўтган.
"Менда бундай маълумотлар йўқ, мен бу ҳақда ҳеч нарса билмайман", дейди Песков Евгений Пригожиннинг қаердалигини билиши ёки йўқлиги ҳақидаги саволга жавоб берар экан.
Песков, шунингдек, Пригожин билан алоқада бўлган хавфсизлик кучлари ва ҳарбийларнинг лавозимларидан истеъфога чиқарилиши ёки чиқарилмаслиги ҳақидаги саволга жавоб бермаган.
"Бу савол мутлақо менинг ваколатимга кирмайди", дейди у.
Эслатиб ўтамиз, Евгений Пригожин 24 июнь куни муваффақиятсиз амалга оширилган исёндан сўнг ғойиб бўлганди. Кейинроқ унинг матбуот хизмати унга тегишли овозли хабарни эълон қилди. Харбий блогер Владимир Романов эса унинг ҳибсга олинганини ёзган.
Беларусь фуқароси Александр Лукашенко 27 июнь куни “Вагнер” гуруҳи раҳбари Евгений Пригожин 24 июндаги келишувга асосан Беларусда эканлигини маълум қилган. Россия Президенти Путин, унинг беларуслик ҳамкасби Александр Лукашенко ва “Вагнер” раҳбарияти ўртасида бўлиб ўтган ушбу музокараларда томонлар “Россия ҳудудида қонли қирғин”га йўл қўймаслик тўғрисида келишиб олган. Лукашенко "Вагнер" раҳбаридан, айниқса, тинч аҳоли орасида қурбонлар бўлмаслигини талаб қилганини тасдиқлади. Унинг сўзларига кўра, Пригожин унга гуруҳнинг тинч аҳолини ўлдириш мақсади йўқлиги ҳақида қасам ичган.
Севара Ҳусниддинова