Президентнинг ўғлига қизил карточка кўрсатган ҳакам жазоланди

Аргентина футбол ассоциацияси (AFA) ҳаками Николас Ламолина ташкилот президентининг ўғлига қизил карточка кўрсатгани учун дисквалификация қилинди. Бу ҳақда “Тhe Sun” нашри хабар берди.

Жорий йилнинг 28 октябрь куни Аргентина чемпионати 12-туридан ўрин олган “Барракас Сентраль” ва “Бока Хуниорс” ўртасидаги кескин кечган учрашувда бош ҳакам Николас Ламолина томонидан қабул қилинган қарорлар катта баҳс-мунозараларга сабаб бўлди. Бош ҳакам учрашувнинг 14-дақиқасида “Барракас” футболчиси Иван Тапиага (АFA президенти Чики Тапианинг ўғли ) иккинчи сариқ карточкани кўрсатиб, майдондан четлатган.

26 ёшли ярим ҳимоячи Паредесга нисбатан қўполлик ишлатгани учун майдондан четлатилган, бироқ учрашувдаги бошқа баҳсли эпизодлар, хусусан, “Барракас” футболчилари Рафаэль Барриос ва Хавьер Руиснинг қўпол ўйинлари учун жазоланмагани футбол жамоатчилиги эътирозига сабаб бўлган. VAR тизими бу вазиятларни текширган бўлса-да, ҳакам қарорлари ўзгартирилмаган. Якунда “Бока Хуниорс” жамоаси учрашувни 3:1 ҳисобида ғалаба билан якунлаган.

Орадан икки кун ўтиб, 42 ёшли Ламолина келаси тур учрашувлари учун ҳеч қандай ўйинга тайинланмагани эълон қилинган. АFA расмийларига кўра, бу ҳакамнинг ўйиндаги хатолари билан боғлиқ бўлган, бироқ ташкилот томонидан бошқа жазо чоралари очиқланмаган.

Бу воқеа Аргентина футболида ҳакамлик мустақиллиги ва адолатлилиги масаласини яна кун тартибига чиқарган. Маҳаллий шарҳловчилар бу ҳолатни “футболдаги куч ва таъсир ўртасидаги мураккаб мувозанатни” акс эттирувчи ҳодиса деб баҳоламоқда.