“Президент худонинг элчиси эмас”. Тўқаев қачон истеъфога чиқишини айтди (видео)

Қозоғистон Президенти Қосим-Жомарт Тўқаев 2029 йилда президентлик лавозимини тарк этишини маълум қилди. Бу ҳақда у “Al Jazeera” телеканалига берган интервьюсида айтиб ўтди.

“2029 йилда мен истеъфога чиқишимни аллақачон эълон қилганман. Чунки бу халқимнинг ва шахсий талабим”, деди Президент.

Унинг сўзларига кўра, у ҳар қандай давлат Президенти давлат бошқарувчиси эканлигига қатъий ишонади.

“У Худонинг элчиси эмас. У ўз халқи томонидан сайланган давлат бошқарувчиси. Бизда эса бор-йўғи етти йилга”, деди Президент.

Давлат раҳбари, шунингдек, ислоҳотлар жараёни жуда узоқ ва барқарор эканини, Қозоғистон ислоҳотлар мамлакати эканини айтди.

“Ислоҳотларимизни давом эттирамиз, узлуксиз олиб борамиз. Ва ҳеч қандай тўсиқ бўлмайди. Менинг ишончим комилки, биз Қозоғистон манфаати учун муҳим ислоҳотларни амалга оширишимиз керак”, деди давлат раҳбари.

Маълумот учун, Қосим-Жомарт Тўқаев 2019 йил 20 март куни Қозоғистон Президенти сифатида қасамёд қилган. Мамлакатнинг биринчи президенти Нурсултон Назарбоев эса истеъфога чиқди. Президент истеъфога чиққанда, Қозоғистон Республикаси Сенатининг спикери сайловлар ўтказилгунга қадар давлат раҳбари вазифасини бажарувчи бўлади. 2019 йил июнь ойида бўлиб ўтган навбатдан ташқари сайловда Тўқаев 70 фоиздан кўпроқ овоз олган. 

2022 йил январь ойида Қозоғистонда бўлиб ўтган норозилик намойишларидан сўнг, Тўқаев Конституцияга давлат раҳбари фақат бир маротаба, етти йиллик муддатга сайланиши мумкинлиги ҳақида ўзгартириш киритган эди. 2022 йил 20 ноябрда бўлиб ўтган навбатдан ташқари президентлик сайловларини Тўқаев 81,31 фоиз овоз олди.