Престианни Винисиус билан можарода айбдор бўлса, “Бенфика”дан ҳайдалади – Моуриньо 

Португалиянинг “Бенфика” жамоаси бош мураббийи Жозе Моуриньо клуб футболчиси Жанлука Престианни Винисиус билан юзага келган ирқчилик можаросида айбдор деб топилса, жамоадан четлатишини маълум қилди. Бу ҳақда ESPN хабар берди.

“Агар менинг футболчим менинг тамойилларим ва “Бенфика”нинг қадриятларига ҳурматсизлик қилган бўлса, унда унинг Жозе Моуриньо бошқарувидаги жамоада келажаги бўлмайди. Мен олим эмасман, аммо жоҳил ҳам эмасман. Айбсизлик презумпцияси – инсон ҳуқуқи. Агар у ҳақиқатан ҳам айбдор деб топилса, мен унга энди аввалгидек қарай олмайман ва у учун бу ерда ҳаммаси тугайди”, дейди Жозе Моуриньо.

Жорий йилнинг 18 февраль куни Чемпионлар лигаси плей-офф босқичида “Бенфика” ва “Реал Мадрид” (0:1) ўртасидаги илк учрашувда мадридликлар ҳужумчиси Винисиус Жуниор ҳакамга мурожаат қилиб, Престианни уни “маймун” деб ҳақорат қилганини даъво қилган. Аргентиналик футболчи айбловларни рад этди. 

Эпизод вақтида Престианнининг оғзини либоси билан ёпиб гапиргани сабабли вазиятни аниқлаш қийин бўлган. Шунга қарамай, Престианни жавоб учрашувида майдонга тушмади. UEFA ҳолат юзасидан текширув ўтказмоқда.

Маълумот учун, Престианни 2024 йил қишида “Велес Сарсфилд”дан 9 миллион евро эвазига “Бенфика”га кўчиб ўтган. 20 ёшли футболчи Португалия клуби сафида 45 та ўйинда майдонга тушиб, 3 та гол ва 4 та ассист қайд этган. Унинг клуб билан шартномаси 2029 йил ёзигача амал қилади.