Португалия терма жамоасини ким бошқариши маълум бўлди

Тажрибали мутахассис Жорже Жезуш Португалия миллий терма жамоаси бош мураббийи этиб тайинланиши кутилмоқда. Бу ҳақда “A Bola” нашри хабар берди.

Манбага кўра, Жезуш жамоа АҚШдан Португалияга қайтгач, мамлакат футбол федерацияси билан музокара ўтказади. Федерация 71 ёшли мутахассисни Португалия, Испания ва Марокаш ҳамкорликда мезбонлик қиладиган 2030 йилги Жаҳон чемпионатига тайёргарлик кўриш учун энг муносиб номзод сифатида баҳоламоқда.

Маълумот учун, Жорже Жезуш 2025 йил июлидан 2026 йил майига қадар Саудия Арабистонининг “Ал-Наср” клубини бошқарди. У жамоани мамлакат чемпионлигига олиб чиққанидан сўнг клубни тарк этишини эълон қилди.

Бундан аввал у 2023-2025 йилларда, шунингдек, 2018-2019 йилларда “Ал-Ҳилол”ни бошқарган. Унинг қўл остида жамоа уч марта Саудия Арабистони Суперкубогини, бир марта мамлакат чемпионлиги ва миллий кубокни қўлга киритган.

Португалиялик мутахассиснинг энг катта муваффақиятларидан бири “Бенфика” билан боғлиқ. У клубни уч марта мамлакат чемпиони (2010, 2014, 2015), бир марта Португалия кубоги (2014) ва беш марта мамлакат Суперкубоги (2010, 2011, 2012, 2014, 2015) соҳиби қилган.

Жезуш фаолияти давомида Бразилиянинг “Фламенго”, Туркиянинг “Фенербаҳче”, шунингдек, Португалиянинг “Спортинг”, “Брага”, “Белененсеш”, “Морейренсе” ва “Витория Гимарайнш” клубларида ҳам бош мураббий сифатида ишлаган.

Эслатиб ўтамиз, аввалроқ испаниялик Роберто Мартинес Жаҳон чемпионати 1/8 финалида Португалия Испанияга 0:1 ҳисобида мағлуб бўлиб, мусобақани тарк этганидан сўнг бош мураббийлик лавозими кетишини маълум қилган эди.