Португалия эртага Фаластин давлатини тан олади

Португалия эртага, 21 сентябрь куни Фаластин давлатини тан олади. Бу ҳақда кеча, 19 сентябрь куни мамлакат Ташқи ишлар вазирлиги баёнот берди. 

“Расмий тан олиш маросими келаси ҳафтадаги БМТнинг Олий даражадаги анжуманидан олдин бўлиб ўтади”, дейилади баёнотда.

Ташқи ишлар вазири Паулу Ранжел шу ҳафтада Буюк Британияга ташрифи чоғида мамлакати Фаластин давлатини тан олиш масаласини кўриб чиқаётганини айтган эди.

2024 йил май ойида Ирландия ва Норвегия билан бирга Фаластин давлатини тан олган ва бошқа Европа Иттифоқи мамлакатларини ҳам шундай қилишга чақирган қўшни Испаниядан фарқли равишда, Португалия эҳтиёткорроқ йўл тутди ва аввал бошқа ЕИ давлатлари билан умумий позиция ишлаб чиқишни хоҳлашини билдирган.

БМТ Бош Ассамблеяси 2012 йил ноябрда Фаластиннинг суверен давлат сифатида де-факто тан олинишини маъқуллаб, унинг БМТдаги кузатувчи мақомини “тўлақонли аъзо бўлмаган давлат” сифатига кўтарган.

Исроил Ғазодаги уруши кўплаб ҳалок бўлишлар, очарчилик ва вайронагарчиликка олиб келаётгани сабабли бутун дунёда тобора кучайиб бораётган норозиликка дуч келмоқда.

Эслатиб ўтамиз, жорий йилнинг август ойида Австралия Бош вазири Энтони Альбанезе Фаластинни тан олишни сентябрь ойида Бош ассамблея йиғилишида эълон қилишини билдирганди.

Шунингдек, Франция Президенти Эммануэль Макрон ҳам июлда БМТ Бош ассамблеясида Фаластинни тан олишга тайёрлигини билдирган эди.

Бундан ташқари, Бельгия, Португалия, Канада ва Мальта каби Ғарб давлатлари ҳам Фаластинни тан олиш ниятида эканини маълум қилган. Уларнинг аксарияти буни яқинда бўладиган БМТ Бош ассамблеясида амалга оширмоқчи.