Портлаш хавфи: Air India самолёти фавқулодда сигнал берди

Бугун, 14 октябрь куни Германиянинг Франкфурт шаҳридан Ҳиндистоннинг Деҳли шаҳрига парвозни амалга ошираётган Air India самолёти эҳтимолий қўлга олиш сигнали берилганидан сўнг Жайпур аэропортига фавқулодда қўнди. Бу ҳақда “The Times of India” хабар берди.

Нашрнинг ёзишича, Франкфуртдан Деҳлига учиб кетаётган Air India рейси самолётининг эҳтимолий қўлга олиш таҳдиди туфайли сигнализация ишлаб кетгач, Ҳиндистоннинг бошқа шаҳри – Жайпурга йўналтирилган.

Дастлабки маълумотларга кўра, Мумбай ҳудуди узра парвоз қилаётган вақтда пилот Squawk 7500 кодини фаолаштирган – бу самолёт ўғирлангани ёки ноқонуний аралашув содир бўлганини билдирувчи халқаро миқёста тан олинган код.

Маълум қилинишича, AI-2030 рейси самолёти хавфсиз тарзда қўнган ва авиация хавфсизлиги бўйича фавқулодда вазиятлар стандарт оператив қоидаларига қатъий риоя қилинган ҳолда дарҳол махсус ажратилган изоляция зонасига кузатиб борилган.

“The Tribune India” нашрининг ёзишича, самолёт портлаш хавфи туфайли Жайпурга йўналтирилган. Малвия-Нагар тумани полиция комиссарининг ёрдамчиси Шив Даялнинг сўзларига кўра, аэропорт маъмурияти полицияни Франкфурт – Деҳли рейсининг “портлаш таҳдиди” туфайли фавқулодда қўниши ҳақида огоҳлантирган.

Бортдаги йўловчиларнинг сони ҳақида ҳозирча маълумот йўқ. Авиакомпания ҳам ҳали ҳеч қандай баёнот бермаган.

Эслатиб ўтамиз, аввалроқ Flydubai самолёти билан шунга ўхшаш ҳодиса содир бўлган эди. Жорий йилнинг 30 сентябрь куни Дубайдан Тель-Авивга учаётган Flydubai авиакомпаниясининг йўловчи самолёти уни эгаллаб олишга уриниш ҳақидаги сигналдан сўнг Саудия Арабистонининг Табук шаҳри аэропортига фавқулодда қўндирилганди. Бунга учувчилар кабинасидаги мушталашув сабаб бўлган. Мушталашув давомида самолёт бор-йўғи 29 сония ичида баландликни 9410 метрдан 5105 метргача кескин йўқотган.

Boeing 737 MAX 8 бортида 174 киши, жумладан, 27 нафар бола бўлган, уларнинг аксарияти Исроиль фуқаролари. Баъзи йўловчиларнинг сўзларига кўра, аввалига пилотлар кабинасидан бақир-чақир эшитилган, кейин кабина эшиги кенг очилиб кетган ва улар бир пилотнинг жароҳатланганини, кийимлари қонга беланганини кўрган. Унга биринчи ёрдам кўрсатилган, йўловчилардан бири шифокор бўлиб чиққан. Экипаж аъзолари ва рейс йўловчилари ҳужум қилган шахсни зарарсизлантиришга ҳам муваффақ бўлган.

Рейс учувчиси жароҳатлар билан Саудия Арабистонида шифохонага ётқизилган Ҳиндистон фуқароси Смит Маччхар бўлган. Ҳиндистон Бош вазири Нарендра Моди билан видеоалоқа орқали мулоқотда у ҳужумдан сўнг самолёт баландликни жадал йўқотаётганини ва вақт деярли қолмаганини тушунганини айтиб берган.

“Мен полда жароҳатланиб ётардим, лекин ўзимга сўнгги ҳаракатни қилиб, эшикни ичкаридан очишим кераклигини айтдим. Эмаклаб боришга ҳаракат қила бошладим. Эшик жуда яқин эди. Уни очишга муваффақ бўлдим ва бошқа одамлар кириб келишди”, дейди у.

Моди учувчининг ҳаракатларини кўпчиликнинг ҳаётини сақлаб қолган мардлик, ирода ва тезкор қарор қабул қилиш қобилиятининг намоён бўлиши деб атаган.

“The Telegraph” маълумотларига кўра, ҳужум пайтида Маччхар бўйнидан оғир жароҳат олган, унинг чап қўли эса деярли кесилиб кетган эди. Шифохонадан эълон қилинган кадрларда унинг боши ва қўлларида боғламларни кўриш мумкин. Гувоҳларнинг айтишича, ҳужумдан сўнг учувчи кўп қон йўқотиб, аста-секин ҳушидан кетган. Унга йўловчилардан бири, стоматолог Шота Мусаев ёрдам кўрсатган.

Саудия Арабистонига қўнишни авиаҳалокатнинг олдини олган ҳолда, бортда йўловчи сифатида кетаётган бошқа икки учувчи амалга оширган. CNN телеканалининг аниқлик киритишича, самолётни кейинги рейсни бажариши керак бўлган икки нафар “заҳирадаги пилот” қўндирган.