Польшада Беларусь разведкасига ишлаган 2 жосус қўлга олинди

Бугун, 2 июль Польша хавфсизлик хизмати Беларусь разведкаси фойдасига жосуслик қилганликда гумон қилинган икки шахсни қўлга олди. Бу ҳақда “Reuters” хабар берди.

Польша хавфсизлик хизмати матбуот котиби Яцек Добжинскийнинг маълум қилишича, гумондорлар Варшавада яшовчи беларуслик муҳожирлар ҳамжамияти ташкил этган тадбирларда қатнашиб, иштирокчиларни яширин тарзда суратга олган ва видеога ёзиб борган. Тўпланган материаллар шарқий чегара орқали Беларусга узатилган ва Лукашенко хизмати ҳамда режим тарғиботида фойдаланилгани айтилмоқда.

Суд қарорига кўра, 19 ёшли Беларусь фуқароси уч ой муддатга қамоққа олинган. 44 ёшли Польша фуқаросига эса мамлакатни тарк этиш тақиқланган ва у полиция назоратига олинган. Варшавадаги Беларусь элчихонаси ҳозирча ушбу ҳолат юзасидан расмий изоҳ бермаган.

Маълумот учун, Польша расмийлари сўнгги йилларда Беларусь ва Россияни ўз ҳудудида жосуслик ҳамда таъсир ўтказиш операцияларини амалга оширишда бир неча бор айблаган. Минск ва Москва эса бундай айбловларни рад этиб келади.

Польшанинг Ички хавфсизлик агентлиги хорижий разведка хизматлари фақат маълумот йиғиш билан чекланмай, балки муҳожирлар ҳамжамиятига босим ўтказиш, уларни қўрқитиш ҳамда душман давлатлар тарғиботини кучайтиришга ҳам уринаётганини қайд этган.

Эслатиб ўтамиз, аввалроқ Польшада жосусликда гумонланиб қўлга олинган шахслар орасида Беларусь фуқоролари ҳам борлиги аниқланиб, ҳолат юзасидан Польша Ташқи ишлар вазирлиги Беларуснинг Варшавадаги элчихонаси вакили Александр Чесновскийни чақиртирганди.

Мумтозбегим Абдумўминова