Польшада сиёсий инқироз. Дональд Тускдан истеъфога чиқиш талаб қилинмоқда

Европарламентнинг Польшадан сайланган депутати Ева Зайончковская-Герник Дональд Тускни мамлакат Бош вазири лавозимидан истеъфога чиқишга чақирди. Бу ҳақда у ўзининг X ижтимоий тармоғидаги саҳифасида ёзди. 

“Вазирлар кенгаши раиси Дональд Тускни зудлик билан ўз вазифаларини бажаришдан, жумладан, барча куч ишлатар тузилмалар ва махсус хизматларга раҳбарлик қилишдан четлатишни таклиф қиламан”, деб ёзди у.

Ева Зайончковская-Герник Дональд Туск ҳукумати ва Польша Президенти Кароль Навроцкий ўртасида Конституциявий трибунал раҳбарияти масаласи сабабли келиб чиққан ўткир сиёсий инқироз фонида шу тариқа ўз эътирозини билдирган. Мухолифат Бош вазир кабинетини давлат раҳбари ва судьяларнинг бир қисми томонидан эътирозга сабаб бўлган суд раҳбариятини алмаштиришга уринишда айблаган.

Аввалроқ, Варшавада Конституциявий суд биноси олдида намойишчилар тўплангани ҳақида хабар берилган эди. Бунгача Конституциявий трибунал судьяси Анна Корвин-Пиотровска трибунал раиси Богдан Свенчковский ва унинг ўринбосари Бартоломей Соханьскийни ўз вазифаларини бажаришдан четлатишга қарор қилган эди. Унинг фикрича, улар сабабли трибунал қарорлар қабул қила олмаётган эди.

Конфликтнинг моҳияти: 2015–2023 йилларда ҳокимиятда Қонун ва адолат (PiS) партияси бўлган. Ушбу даврда у трибуналга уч нафар судьяни қоидабузарликлар билан тайинлаган. Европа судлари эса трибунални мустақил деб ҳисоблаб бўлмаслигини тан олган. 

Дональд Туск 2023 йилда ҳокимиятга келганидан сўнг, унинг ҳукумати Конституциявий трибуналнинг легитимлигини тан олишни тўхтатган. 2026 йилнинг март ойида парламент янги судьяларни сайлашни бошлаган ва октябрь ойига келиб саккиз нафарини тайинлаган. Кароль Навроцкий улардан беш нафарининг, жумладан, Анна Корвин-Пиотровсканинг қасамёдини қабул қилишдан бош тортган. Суднинг амалдаги раиси Богдан Свенчковский уларни ишга қўймаган. Беш нафар судья қасамёдни Президент ҳузурида эмас, балки парламентда мустақил равишда қабул қилган.

Эслатиб ўтамиз, аввалроқ Албания пойтахти Тиранада ҳукуматга қарши намойишлар олтинчи кун давом этиб, полиция билан тўқнашувлар оқибатида 272 киши жароҳатлангани ҳақида хабар берилган эди. Мамлакат Бош вазири Эди Рама эса намойишчиларнинг истеъфога чиқиш талабини рад этганди.