Пит Ҳегсет Мадуронинг қандай қўлга олинганини айтиб берди (видео)

АҚШ Мудофаа вазири Пит Ҳегсет Мадурони қўлга олиш ва ҳибсга олиш бўйича операциянинг янги тафсилотларини очиб берди. У бу операцияни “мукаммал режалаштирилган” деб таърифлади. Бу ҳақда у Виржиния штати Ньюпорт Ньюс шаҳридаги USS John F. Kennedy авиация ташувчи кемасининг денгизчиларига қилган мурожаатида айтиб ўтган. 

Ҳегсетнинг сўзларига кўра, Мадуро “тунги кўриш кўзойнакларини таққан ажойиб америкаликлар” билан учрашган ва улар келаётганини фақат уч дақиқа олдин билган. Пентагон раҳбари, шунингдек, Венесуэла етакчисининг рафиқаси ушбу операцияни самолёт овозига ўхшатганини айтиб берди. 

“Аслида, унинг рафиқаси шундай деди: “Менимча ташқаридан самолёт овозини эшитяпман”. Улар ҳеч нарсани билишмади. Биласизми, нега? Чунки бу занжирдаги ҳар бир бўғин ўз вазифасини мукаммал бажарди.”, дейди Уруш вазири. 

Ҳегсетнинг айтишича, тахминан 200 нафар америкалик ҳарбий шанба куни кечаси Мадуро яшайдиган уйга қилинадиган рейдда иштирок этган. Ф-жетлар ва бомбардимончилар Венесуэла ҳаво мудофаасини зарба бериб тозалаган, шундан сўнг Delta Force номли махсус тайёргарликдан ўтган ҳарбийлар гуруҳи бинога яқинлашган. 

Президент Дональд Трамп Air Force One самолётида ҳарбий операция ҳақида журналистларга шундай деди: 

“Улар вертолётдан тушишди ва шу заҳоти отишма бошланди. Билсангиз, вертолётлардан бири жиддий зарба олди, лекин биз ҳамма нарсани қайтариб олдик”.

Қўшма Штатлар расмийларига кўра, бир неча америкалик аскарлар ушбу операция давомида жароҳат олган. Венесуэлаликлардан эса бир неча киши ҳалок бўлган, шунингдек, Мадуронинг хавфсизлик хизматидаги 32 нафар кубалик фуқаролар ҳам вафот этган. 

АҚШ кучлари комплексга кирганидан кейин, Мадуро хавфсиз хонага етиб боришидан олдин ушланган, дея хабар берилган. Операция бир неча ой давомида Мадуронинг уйи нусхаси билан машқ қилинган ва турли сценарийларга тайёрланган. 

Бош штаб раиси Генерал Дэн Кейннинг айтишича, операция такрорлаш ва захира тизимига асосланган: 

“Биз ўйлаймиз, ишлаб чиқамиз, машқ қиламиз, тайёрлаймиз, яна машқ қиламиз ва яна машқ қиламиз. Мақсад – тўғри қилиш эмас, балки хато қилиш имконини йўқ қилишдир.” 

АҚШ расмийларининг маълум қилишича, МРБ ходимлари август ойидан бери Мадуро ҳаракатларини кузатиб келган, жумладан унинг ички доирасига кирган агент орқали муҳим разведка маълумотларини олган. Шу билан бирга, Венесуэла қирғоқларида катта АҚШ ҳарбий контингенти жойлаштирилган.