Пезешкиён Нью-Йоркдаги сессияда АҚШ ва Исроилни қоралади

Эрон Президенти Масъуд Пезешкиён араб давлатларига қарши уюштирилаётган ҳужумларни қоралаб, барчасига АҚШ ва Исроил айбдор экани ва улар жавоб бериши кераклигини таъкидлади. Бу ҳақда Эрон Президенти БМТ Бош Ассамблеясининг 80-сессиясидаги нутқида айтиб ўтди.

У ўз чиқишида ҳақиқий хавфсизлик куч ишлатиш орқали эмас, балки ишончни мустаҳкамлаш, минтақавий ҳамкорлик ва ўзаро ҳурмат орқали таъминланишини таъкидлаган. 

Пезешкиён АҚШ ва Исроил томонидан Эронга уюштирилган ҳарбий ҳужумларни дипломатия ва тинчликка нисбатан “катта хиёнат” деб атаган ҳамда Ғазо секторидаги “геноцид” ва “Катта Исроил” концепциясини қоралаган.

Эрон Президенти, шунингдек, Ғарб давлатларини Эрон ядровий келишувини издан чиқаришда айблаган. У расмий Теҳрон ҳеч қачон ядровий қурол ишлаб чиқишга интилмагани ва бундай мақсадга эга эмаслигини яна бир бор тасдиқлаган. 

Нутқ давомида Пезешкиён Ғазодаги “геноцид”, Ливан ва Сурия инфратузилмасининг вайрон қилиниши, Яман халқига қарши ҳужумлар ва болалар очликка маҳкум қилинаётганини мисол қилиб келтириб, бу жараёнларда Исроил ва АҚШни асосий айбдор сифатида тилга олган. Унга кўра, мазкур тажовузкорлик нафақат Эрон, балки бутун минтақа барқарорлигига таҳдид солмоқда.

Пезешкиён Эрон халқининг тарихий сабр-тоқати ва миллий бирлигини алоҳида қайд этган.

“Эрон ҳеч қачон босқинчиларга бўйин эгмаган, бугун ҳам иймон ва бирликка таяниб, тажовузкорларга қарши тик турибди”, дея урғулаган давлат раҳбари. 

Президент минтақада “қудрат куч орқали эмас, балки тинчлик орқали” тамойилига асосланган келажакни илгари сурган. У коллектив хавфсизлик, инсон қадр-қиммати, иқтисодий ҳамкорлик, энергия ресурсларидан адолатли фойдаланиш ва экологияни муҳофаза қилишни ўз ичига олган концепцияни таклиф қилган.

Эрон раҳбари, шунингдек, минтақавий можароларга тўхталиб, Озарбайжон ва Арманистон ўртасидаги тинчлик жараёнини қўллаб-қувватлашини, Россия ва Украина ўртасидаги урушни адолатли ва барқарор келишув орқали якунлашга умид билдиришини, шунингдек, Саудия Арабистони ва Покистон ўртасидаги мудофаа шартномасини минтақавий хавфсизлик тизими сари муҳим қадам сифатида эътироф этган.

Сўзининг якунида Пезешкиён тинчликсевар давлатлар билан дўстлик ва ҳамкорликка тайёр эканини билдирган.

Эслатиб ўтамиз, аввалроқ Масъуд Пезешкиён давлат телевидениеси орқали мамлакати ҳар қандай “снепбэк” жараёни орқали санкциялар қайта жорий этилса ҳам, уларни енгиб ўта олишини таъкидлаганди. Унинг бу баёноти БМТ Хавфсизлик Кенгаши Эронга нисбатан санкцияларни доимий равишда бекор қилишни рад этганидан сўнг янграган.