Пезешкиён Эрон пойтахтини кўчиришнинг жиддий сабабларини айтди

Эрон Президенти Масъуд Пезешкиён пойтахтни Теҳрондан кўчиришни таклиф қилди. Бу ҳақда “The Guardian” хабар берди.

У ташаббусга сабаб сифатида экологик инқирозни кўрсатди. Пезешкиён Хормозган вилоятидаги чиқиши чоғида пойтахтни кўчириш режаси ҳақида маълум қилган. Эрон Президентининг тушунтиришича, ҳозирги пойтахтда сув танқислиги жуда кучли, шаҳар ҳаддан ташқари гавжум ва тупроқнинг чўкиш хавфи ортиб бормоқда.

Унинг таъкидлашича, Теҳрон, Караж ва Қазвин аллақачон жиддий сув инқирозига дуч келган ва уни оддий чоралар билан ҳал қилиб бўлмайди. Аввалроқ бошқа президентлар ҳам пойтахтни кўчириш масаласини кўтарган эди, жумладан, Ҳасан Руҳоний ҳам вариантлар билан режа тайёрлаганди. Аммо олий раҳбар ташаббусни қабул қилишдан бош тортганди.

Пезешкиённинг эслатишича, 2024 йилда ёғингарчилик нормаси 260 мм га нисбатан атиги 140 мм бўлган, 2025 йилда эса бу кўрсаткичлар 100 мм дан пастга тушган.

“Сувомборларидаги сув сатҳининг камайиши, қудуқларнинг қуриб кетиши ва бошқа минтақалардан сув ташиш нархининг юқорилиги ёндашувни ўзгартириш зарурлигидан далолат беради. Теҳронга сув етказиб бериш ҳар бир кубометр учун 4 еврогача бўлиши мумкин”, дейди у.

Унинг сўзларига кўра, авваллари сувомборлари пойтахт эҳтиёжларининг 70 фоизини таъминлаган, бироқ ёғингарчиликнинг камлиги ва буғланишнинг кўплиги туфайли уларнинг улуши камайиб, ерости манбаларига босим кучайиб бормоқда.

“Баъзи ҳудудларда ер йилига 30 см гача чўкмоқда. Бу фалокатдан ва ерости сувлари тугаб бораётганидан далолат”, дея огоҳлантирди Президент.

Бир йил аввал у бу ташаббусни Эрон олий раҳнамоси Оятуллоҳ Али Хоманаийга тақдим этганди. Ўша пайтда бу таклиф қаттиқ танқид қилинган эди. Пезешкиённинг даъво қилишича, муаммолар шу қадар жиддийки, мамлакатнинг бошқа чораси йўқ.

Пойтахт Форс кўрфази соҳилидаги Хормозган вилоятига кўчирилиши мумкин. Бу очиқ сувларга тўғридан тўғри киришни таъминлайди ва савдони осонлаштиради.

Теҳронда 10 миллиондан ортиқ аҳоли истиқомат қилади. Пойтахт ҳар йили мамлакат сув ресурсларининг қарийб чорак қисмини истеъмол қилади.

Эслатиб ўтамиз, 2024 йилнинг сентябрь ойида Эрон Президенти Масъуд Пезешкиён мамлакат пойтахтини Теҳрондан Форс кўрфази соҳилларига кўчириш зарурлигини айтганди.