Пентагон раҳбари яна шифохонага ётқизилди
Олам
−
12 Февраль
3722АҚШ Мудофаа вазири Ллойд Остин яна шифохонага ётқизилди. Бу ҳақда Пентагон матбуот котиби Патрик Райдер маълум қилди.
Остин кеча, 11 февраль куни тушдан кейин Валтер Рид миллий ҳарбий тиббиёт марказига олиб кетилган. Бу ҳақда мудофаа вазири ўринбосари ва АҚШ Қуролли кучлари штаб бошлиқлари бирлашган қўмитаси раиси, шунингдек, Оқ уй ва Конгрессга маълум қилинган.
"Пентагон раҳбари шифохонага ётқизиш пайтида ўз вазифаларини ўринбосари Кетлин Хиксга топширди", дея қўшимча қилган кейинчалик Райдер.
13 февраль куни АҚШ Мудофаа вазири Украина мудофаа алоқа гуруҳининг навбатдаги конференсиясини (Рамштейн формати деб ҳам аталади) ўтказиш учун Брюсселга учиши керак эди. Шундан сўнг, Остин НАТО мудофаа вазирлари йиғилишида иштирок этиши керак эди.
Унинг шифохонага ётқизилиши бу режаларга қандай таъсир қилиши номаълум.
Эслатиб ўтамиз 1 январь оқшомида ҳам Пентагон раҳбари Валтер Рид (Мэриленд штати) Миллий тиббиёт марказига ётқизилганди. 9 январь куни эълон қилинган тиббиёт маркази баёнотида айтилишича, мутахассислар Мудофаа вазирига 2023 йил декабрида простата саратони ташхисини қўйган ва у 1 январь куни операция қилинган.
Мутахассислар Остиннинг тўлиқ тикланишини кутишини, аммо бу узоқ жараён бўлиши мумкинлигини таъкидлади. АҚШ Конгресси аъзолари Остиндан Пентагон нега унинг шифохонага ётқизилгани ҳақида жамоатчилик ва расмийларни зудлик билан хабардор қилмаганини тушунтиришни талаб қилган. Мудофаа вазирлиги Остиннинг қаерда эканлиги ҳақидаги маълумотни уч кун давомида Оқ уйдан сир сақлаган. 9 январь куни Вакиллар палатасининг Қуролли кучлар қўмитаси Мудофаа вазирининг шифохонага ётқизилиши билан боғлиқ ҳолатларни текширишни бошлади.
LiveБарчаси