Пентагон Киевга яна 500 млн долларлик ҳарбий ёрдам юборади. Унга нималар киради?

АҚШ Мудофаа вазирлиги Украинага 500 миллион долларлик янги ёрдам пакетини юборишини эълон қилди. Бу ҳақда Пентагоннинг расмий саҳифасида чоп этилган ҳужжатда айтилди.

Янги ёрдам пакети ўнлаб Bredley пиёдалар жанговар машиналари, Stryker зирҳли жанговар техникалари, шунингдек, Patriot зенит-ракета тизими учун ўқ-дориларни ўз ичига олади.

Бундан ташқари, янги пакетда термал тасвир тизимлари ва тунги кўриш қурилмалари, генераторлар ҳамда автомобилларни таъмирлаш ва ҳудудларни миналардан тозалаш учун турли жиҳозлар ҳам бор.

Шунингдек, ушбу пакет 30 та Bradley IFV, 25 та Stryker AFV, Stinger ер-ҳаво ракета тизимлари, HIMARS ракета-артиллерия тизимининг ўқ-дорилари, портловчи снарядлар ва муҳандислик тўсиқларини енгиб ўтиш учун воситалар, 155 ва 105 миллиметр калибрли артиллерия ўқларини ўз ичига олади.  

Эслатиб ўтамиз, шу ой бошида Пентагон Киевга 300 миллион долларлик ҳарбий ёрдам ажратишини эълон қилганди.