Пашинян Озарбайжон билан эҳтимолий уруш ҳақида гапирди

Арманистон Озарбайжоннинг Қорабоғ ҳудудидаги ҳарбий амалиётларда қатнашишни режалаштирмаяпти. Бу ҳақда Арманистон Бош вазири Никол Пашинян Хавфсизлик Кенгашининг йиғилишидан сўнг маълум қилди. 

“Арманистон жанговар ҳаракатларда иштирок этмайди ва яна бир бор таъкидламоқчиман, Арманистон Республикасининг Қорабоғда армияси йўқ. Ҳозирда биз ҳеч қандай шошқалоқ ҳаракатлар қилмаймиз”, деган Бош вазир.

“Вестник Кавказа” нашрининг катта таҳлилчиси Андрей Петровнинг таъкидлашича, Никол Пашиняннинг баёнотини икки хил талқин қилиш мумкин. 

Биринчиси, Арманистон ҳақиқатан ҳам икки давлат чегарасида Озарбайжон қўшинларига ҳужум қилишга уринмайди. Иккинчиси эса Арманистон ҳужум қилади, лекин Ереван анъанага кўра, жанговар ҳаракатларни қўзғатишда ўз айбини рад этади.

“Қайси сценарий Пашинян учун фойдалироқ? Шубҳасиз, биринчи. Ереваннинг ушбу аксилтеррор операцияга аралашуви Озарбайжонга қарши уруш эълон қилиш бўлиб, бу Арманистон ҳукумати учун катта хавф туғдиради. Пашинян ҳар қандай вазиятда ҳам ҳокимиятда қолишни афзал кўриши тайин”, дейди Андрей Петров.

Таҳлилчига кўра, агар Арманистон ҳақиқатан ҳам Озарбайжонга қарши кенг кўламли ҳарбий амалиётлардан воз кечса, Қорабоғ иқтисодий ҳудудидаги аксилтеррор операцияси бир неча кун ичида тугайди ва кейинчалик икки давлат ўртасидаги ҳарбий тўқнашувлар давом этмайди. Шунда Озарбайжон ва Арманистон ўртасида тинчлик шартномаси тезроқ имзоланиши учун энг яхши шароитлар яратилади.

“Шу билан бирга, арман армияси ҳамон жанговар ҳаракатларда иштирок этаётганини қўшимча қилиш керак. Пашинян арман ҳарбийлари Хонкендида эканлигини инкор этади, аммо бу ёлғон. Арманистон Қуролли Кучларининг бўлинмалари урушдан кейинги бутун уч йил давомида Россия тинчликпарвар кучларини вақтинча жойлаштириш зонасида бўлган. Маълум бўлишича, Арманистон расмийлари халқаро миқёсда ўзларига кераксиз муаммоларни келтириб чиқармаслик учун энди улардан воз кечмоқда. Дарҳақиқат, Озарбайжонда ноқонуний яшаётган бу ҳарбийлар энди ўз амри билан тақдир тақозосига ташлаб кетилган. Шунинг учун улар учун энг яхши чиқиш йўли қуролларни ташлаб, таслим бўлишдир”, деб хулоса қилган “Вестник Кавказа” катта таҳлилчиси.

Эслатиб ўтамиз, олдинроқ Озарбайжон Мудофаа вазирлиги Қорабоғда “Озарбайжон Республикасининг конституциявий тузумини тиклаш мақсадида” маҳаллий аксилтеррор чоралари бошланганини эълон қилганди. Баку тинч аҳоли ва фуқаролик инфратузилмаси нишон эмаслигини таъкидлаганди. Кейинчалик Озарбайжон Мудофаа вазирлиги хавфли ҳудуддан аҳолини эвакуация қилиш учун гуманитар йўлаклар ва қабул пунктлари яратилганини билдирган. Воқеалар фонида Арманистон Бош вазири Никол Пашинян Хавфсизлик кенгаши йиғилишини ўтказиб, (тан олинмаган) Тоғли Қорабоғдаги вазиятни муҳокама қилган. Арманистон ТИВ эса Озарбайжонни (тан олинмаган) Тоғли Қорабоғ аҳолисига қарши “кенг кўламли тажовуз”ни бошлаганликда айблаган.