Пашинян арманлар геноцидининг асосий сабабини айтди

Усмонлилар империясидаги арманлар геноциди арман халқининг халқаро фитналар жараёнига тортилиши оқибатида содир бўлган – бу жараён XIX аср ўрталарида бошланиб, 1915 йилда ўзининг фожиали чўққисига чиққан. Бу ҳақда кеча, 24 апрель куни Арманистон Бош вазири Никол Пашинян фожиали воқеаларнинг 111 йиллиги муносабати билан фуқароларга йўллаган мурожаатида баёнот берди. 

Сиёсатчининг қайд этишича, ҳар йили 24 апрель куни ўн минглаб арманлар “Цицернакаберд” ёдгорлик мажмуасига чиқади ва ҳукумат ҳамда сиёсий кўпчилик томонидан олиб борилаётган курс айнан шунга асосланади. Пашинян давлатчилик ва тинчликни геноцид такрорланмаслигининг кафолати деб атаган.

Бош вазирнинг сўзларига кўра, арманларнинг янги қирғинига йўл қўймаслик учун “халқаро миқёсда тан олинган ҳудудлардан ташқарида ватан излашни тўхтатиш” керак. Пашиняннинг таъкидлашича, йўқотилган ерларни қайтаришга ва аввалги чегараларни тиклашга чақираётган кучлар Арманистонни 1878 йилдаги Сан-Стефано конференцияси рельсларига қўймоқда, бу йўлнинг охирги бекати эса давлатчилик ва ватанни йўқотишдир.

Маълумот учун, ҳар йили 24 апрелда Усмонлилар империясидаги арманлар геноциди – XX асрнинг биринчи геноциди деб аталадиган воқеа хотираси ёд этилади. Туркия ҳозиргача 1,5 миллиондан ортиқ арманнинг оммавий қирғин қилингани ҳақидаги айбловларни рад этиб келади, бироқ геноцид факти кўплаб давлатлар ва халқаро тузилмалар томонидан тан олинган.