Парвозга кечиккан хонимлар учувчидан самолётни тўхтатишни талаб қилди (видео)

Россиянинг Москва шаҳридаги Шереметьево халқаро аэропортида рейсга кечиккан икки аёл самолётга етиб олиш учун учиш-қўниш йўлагига чиқиб, самолётни тўхтатишга уринди. Бу ҳақда “Meduza” хабар берди.

Маълум қилинишича, воқеа жорий йилнинг 25 июль куни содир бўлган. Аёллар “Аэрофлот” авиакомпаниясининг рейсига кечиккан. Улар парвоз олдидан барча хавфсизлик назоратларидан ўтган ва самолётга чиқишдан олдинги ёпиқ ҳудудда бўлган. Бироқ кейинчалик рухсатсиз равишда самолёт учиш-қўниш йўлагига чиқиб, учаётган самолёт ортидан югурган.

Қайд этилишича, видеоларда аёллар қўлларидаги юклари билан самолёт томон югуриб, учувчига қўл силтаётгани ва уни тўхтатишга уринаётгани кўринади. Шундан сўнг улар аэропорт ходимларидан бирига мурожаат қилган. Ходим вазият ҳақида ҳаво ҳаракатини бошқариш хизматига радио орқали хабар берган.

Кўп ўтмай бошқа аэропорт ходимлари ҳам воқеа жойига етиб келиб, аёлларни самолётдан узоқлаштиришга уринган. Йўловчилар ва ходимлар ўртасида тортишув ҳам юзага келган.

Маълумотларга кўра, аёллар хавфсизлик талабларини бузиб, рухсатсиз равишда тақиқланган ҳудудга кирган. Шунингдек, улар қўлга олиниб, Федерал хавфсизлик хизмати ходимларига топширилган.

Аэропорт вакиллари воқеа вақтида бошқа йўловчиларнинг хавфсизлигига таҳдид бўлмаганини билдирган. Аёлларнинг тақиқланган ҳудудга қандай кириб олгани эса ҳозирча номаълум.

Мазкур ҳолат юзасидан транспорт прокуратураси томонидан тергов бошланган. Текширув доирасида аэропорт ва авиакомпания ходимларининг воқеа пайтидаги ҳаракатларига ҳам ҳуқуқий баҳо берилиши кутилмоқда.

Ҳуқуқни муҳофаза қилувчи органлар аёлларга нисбатан қонунчиликда белгиланган чораларни кўрмоқда.

Эслатиб ўтамиз, аввалроқ АҚШнинг Хьюстон шаҳрида Детройтга парвоз қилиши керак бўлган Frontier Airlines авиакомпаниясининг йўловчи самолёти бортидаги йўловчилардан бири бомба билан таҳдид қилгани сабаб эвакуация қилингани ҳақида хабар берилган эди.