Париж яқинидаги 2000 гектардан ортиқ ўрмон ёниб кетди

Франция пойтахти Париж яқинидаги UNESCO биосфера қўриқхонаси ҳисобланган Фонтенбло ўрмонида юз берган йирик ёнғин оқибатида 2050 гектардан ортиқ ҳудуд ёниб кетди. Ҳодиса юзасидан ўт қўйишда гумонланаётган икки киши қўлга олинди. Бу ҳақда “France 24” хабар берди.

Қайд этилишича, ёнғин кеча, 13 июль куни Париждан 60 километр жануби-шарқда жойлашган Фонтенбло ўрмонида бошланган. Орадан бир кун ўтиб яна бир ёнғин юзага келиб, олов тезда UNESCO биосфера қўриқхонаси ҳудудига тарқалган. Ёнғин сабаб Фонтенбло ва унга туташ ҳудудлардан қарийб минг нафар аҳоли эвакуация қилинган. Шунингдек, темирйўл қатнови ва А6 автомагистралидаги ҳаракат вақтинча чекланган.

Ҳодисани бартараф этишга 850 нафарга яқин ўт ўчирувчи, тўртта Canadair самолёти, иккита Dash самолёти ҳамда учта сув ташувчи вертолёт жалб этилган. Қутқарувчилар ёнғинни ўчириш учун 187 марта ҳаводан сув ташлаган.

Минтақавий ўт ўчирувчилар вакили Пол-Эдуард Лореннинг айтишича, ёнғин ҳали ҳам тўлиқ назорат остига олинмаган, бироқ расмийлар уни кун давомида ўчиришга умид қилмоқда.

Полиция ўт қўйишда гумонланаётган икки кишини ҳибсга олган. Улардан бири 18 ёшли йигит бўлиб, терговга яқин манбага кўра, у қўлга олинганида қўлларида куй изи ва ёнида “зажигалка” бўлган.

Франция Ички ишлар вазири Лоран Нунеснинг маълум қилишича, ёнғиннинг қасддан содир этилган ёки этилмагани юзасидан тергов давом этмоқда.

“Тахминан минг метрлик ҳудуд ичида ўнга яқин алоҳида ёнғин ўчоғи аниқланди. Бу ёнғин атайлаб чиқарилган бўлиши мумкинлигини кўрсатади”, деган вазир.

Франция Президенти Эммануэль Макрон эса мамлакатдаги барча мавжуд куч ва воситалар йирик ёнғинни бартараф этишга сафарбар этилганини билдирган.

Мутахассисларнинг қайд этишича, Франция сўнгги уч ой ичида учинчи бор кучли жазирама тўлқинини бошдан кечирмоқда. Иқлим ўзгариши фонида мамлакатнинг турли ҳудудларида ўрмон ёнғинлари сони кескин ортган.

Маълумотларга кўра, йил бошидан буён Францияда ўрмон ёнғинлари 32 минг гектардан ортиқ ҳудудни қамраб олган. Бу кўрсаткич бутун 2025 йилда қайд этилган ёнғинлардан ҳам юқори.

Эслатиб ўтамиз, аввароқ Испаниянинг Андалусия автоном ҳамжамиятидаги Алмерия вилоятининг Лос Галлардос ҳудудида юз берган йирик ўрмон ёнғини оқибатида камида 12 киши ҳалок бўлиб, яна 6 киши жароҳатлангани ҳақида хабар берилганди.