“Пахтакор” Суперкубокдаги ҳакамлик устидан шикоят киритди

Бугун, 15 март куни Ўзбекистон Суперкубоги учрашувида Тошкентнинг “Пахтакор” жамоаси Фарғонанинг “Нефтчи” жамоасига 0:1 ҳисобида мағлубиятга учради. Учрашувдан сўнг “Пахтакор” клуби ҳакамлик қарорларидан норози эканини билдириб, расмий шикоят киритди. Бу ҳақда клуб матбуот хизмати хабар берди.

ЎзПФЛ регламентига биноан жамоамиз Ўзбекистон Суперкубогидаги ҳакамлик устидан шикоят киритиш ҳуқуқидан фойдаланганини маълум қилади. 

Клуб матбуотининг маълум қилишича, Баҳснинг 51-дақиқасида Иброҳим Ибрагимов берган зарбадан кейин рақиб ҳимоячиси тўпни қўли билан қайтарган. Бу ҳолатда унинг қўли нотабиий ҳолатда, тана ҳажмини кенгайтириш учун турган. Бироқ, на бош ҳакам, на VAR ҳакамлари бу вазиятда тўп қўл билан ўйналганини кўрмаган. 

Клубнинг таъкидлашича, ушбу ҳолат такрорий лавҳаларда қўлнинг танадан максимал нотабиий равишда чўзилгани кўринган.

“Биз нафақат жамоамиз, балки Суперлига, Пролига ва Биринчи лига учрашувларининг барчасида адолатли ҳакамлик бўлишини хоҳлаймиз. Чунки ўзбек футболини янада ривожлантириш учун ҳамиша ҳалол ва адолатли ўйинлар зарур деб ҳисоблаймиз”, дейди клуб матбуоти.

Эслатиб ўтамиз, 2025 йилги Ўзбекистон кубоги финалидаги “Пахтакор” ва “Бухоро” жамоалари ўртасида учрашув ҳам ҳакамлик борасида бир қатор норозиликларга сабаб бўлган эди.