Озодбек Назарбековга биринчи ўринбосар тайинланди

Ўзбекистон маданият вазирининг биринчи ўринбосари этиб Жамол Носиров тайинланди. Бу ҳақда бугун, 22 апрел куни Маданият вазирлиги маълум қилди.

“Бухоро вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари сифатида фаолият юритиб келаётган Жамол Носиров Ўзбекистон Республикаси Президентининг 2020 йил 22 апрелдаги қарорига асосан Маданият вазирининг биринчи ўринбосари этиб тайинланди“, дейилади хабарда.

Маълумот учун, Жамол Носиров 1985 йил 12 июнда Бухоро шаҳрида таваллуд топган. 2005 йили Бухоро давлат университетининг жисмоний маданият ва жисмоний тарбия ўқитувчиси, психолог мутахассислиги бўйича тамомлаган. 2008 йили эса университетнинг магистратурасини тугатган.

Бир муддат “Камолот” ЁИҲ Бухоро вилоят Кенгаши раиси лавозимида ҳам меҳнат қилган. Шундан сўнг 27-Жилвон сайлов округидан Олий Мажлис Қонунчилик палатасига депутат этиб сайланган.

Шунингдек, Носиров тадбиркорлар ва ишбилармонлар ҳаракати – Ўзбекистон Либерал-Демократик партиясининг фракцияси аъзоси бўлган. 2017 йилда эса Бухоро вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари этиб тайинланган эди.