Ортиқхўжаев “Пахтакор”га пул тикишни тўхтатди

Тошкент шаҳрининг собиқ ҳокими, тадбиркор Жаҳонгир Ортиқхўжаев “Пахтакор” клуби билан ҳамкорликни тўхтатишини маълум қилди. Бу ҳақда клуб ходимлари маълумотига таяниб, Алишер Никимбаев ўзининг Telegram-каналида маълум қилди.

Клуб ходимларининг айтишича, бу қарор уларга бугун, 24 август куни маълум қилинган. Никимбаевга кўра, Жаҳонгир Ортиқхўжаевнинг “Пахтакор”дан кетиши кутилган воқеа бўлган, аммо унинг бундай қисқа вақт ичида амалга ошиши кутилмаган.

Айни пайтда клубнинг кейинги режалари қандай бўлиши номаълум. Жамоа Элит Чемпионлар лигасидаги илк учрашувини ўтказишига эса уч ҳафтага яқин вақт қолган.

Маълумот учун, “Пахтакор”нинг Элит Чемпионлар лигасидагидаги биринчи рақиби “Ал-Аҳли” бўлади. Ушбу учрашув жорий йилнинг 14 сентябрь куни Саудия Арабистонида ўтказилади.

Эслатиб ўтамиз, жорий йилнинг 2 ноябрь куни Тошкентга Роналду етакчилигидаги “Ал Наср” жамоаси келиши ҳақида хабар берилганди.