Орбан Путинга “барчасига тайёрлиги”ни айтди

Россия Президенти Владимир Путин билан телефон орқали суҳбатда Венгрия Бош вазири Виктор Орбан Будапештда Россия-АҚШ саммитини ташкил этиш учун барча шароитни яратишга тайёрлигини билдирди. Бу ҳақда Кремль хабар берди.

Россия етакчиси, ўз навбатида, Орбанни АҚШ Президенти Дональд Трамп билан телефон суҳбати мазмуни ҳақида маълум қилди.

Путин, шунингдек, Америка томони билан бўлажак музокаралар чоғида Украинадаги можарони тинч йўл билан ҳал қилиш йўлларини излаш бўйича кейинги қадамларни муҳокама қилишни режалаштираётганини ҳам таъкидлади.

16 октябрь оқшомида Путин ва Трамп Россия ташаббуси билан телефон орқали мулоқот қилди. Трамп Truth Social ижтимоий тармоғида Путин билан Будапештда учрашишга келишиб олгани, бироқ ҳозирча аниқ сана белгиланмагани ҳақида ёзган. Кремль бугун учрашув яқин икки ҳафта ичида бўлиб ўтиши мумкинлигини ва уни қолдирмаслик кераклигини айтган.

Саммитга тайёргарлик АҚШ Давлат котиби Марко Рубио ва Россия Ташқи ишлар вазири Сергей Лавров ўртасидаги музокаралар билан бошланади. Венгрия Ташқи ишлар вазири Петер Сийярто 17 октябрь куни телефон орқали мулоқот қилишлари мумкинлигини айтганди. У Будапештда бўлиб ўтадиган АҚШ-Россия саммити санаси ва бошқа тафсилотлари ушбу музокаралар натижасига боғлиқ бўлишини таъкидлаганди. У, шунингдек, Путинни Венгрияда ҳурмат билан кутиб олишига ишонтирганди. Шунингдек, у Россия Президенти Владимир Путиннинг АҚШ Президенти Дональд Трамп билан учрашиш учун Будапештга ташрифи чоғида Халқаро жиноий суд (ХЖС) буйруғи асосида ҳибсга олиниши хавфи йўқлигини маълум қилганди. 

Венгрия 1999 йилда Халқаро жиноий суднинг асосини ташкил этувчи Рим статутини имзолаган ва 2001 йилда уни ратификация қилган, бироқ 2023 йилдаёқ мамлакат расмийлари Путин ташриф буюрган тақдирда у ҳибсга олинмаслигини айтган.

2025 йилда Венгрия ҳукумати Исроил Бош вазири Биньямин Нетаньяхуни мамлакатга таклиф қилди. Нетаньяхунинг ташрифи ортидан Венгрия Халқаро жиноий суддан чиқишини эълон қилди. 2025 йилнинг октябрь ҳолатига кўра, Венгриянинг ХЖСдан чиқиши тугалланмаган эди.

Эслатиб ўтамиз, жорий йилнинг 8 октябрь куни Россия Президенти Владимир Путин давлат ташрифи билан Тожикистонга келганди. Аммо Раҳмон ҳукумати Путинни ҳибсга олмади. Европа Иттифоқи Путинни ҳибсга олмагани учун Тожикистонни Халқаро жиноий суд талабларини бажармаганликда айблади. Сабаби Тожикистон 2002 йилдан бери Халқаро жиноий суд аъзоси саналади.