Олтита мундиаль иштирокчиси Гильермо Очоа фаолиятини якунлади

Мексикалик дарвозабон Гильермо Очоа профессионал футболчилик фаолиятини якунлашга қарор қилди. Бу ҳақда Очоа ижтимоий тармоқдаги саҳифасида маълум қилди.

“Бу орзу мени қанчалик узоққа олиб боришини ҳеч қачон тасаввур ҳам қилмаган эдим. Бугун эса ортимга фахр билан назар ташлаб, оиламга, жамоадошларимга ва ҳар бир қадамда мени қўллаб-қувватлаган барча мухлисларга миннатдорлик билдиришим мумкин. Мен миллионлаб инсонларнинг меҳри ва Мексика учун боримни берганимга бўлган ишончни ўзим билан олиб кетаман. Биз биргаликда бошдан кечирган лаҳзаларни ҳеч ким биздан тортиб ололмайди. Барчаси учун чин қалбимдан раҳмат”,  деб ёзди Очоа.

Гильермо Очоа тарихда олтита Жаҳон чемпионати учун қайдномага киритилган уч нафар футболчидан бири ҳисобланади. Бироқ у мусобақанинг фақат тўрттасида – 2014, 2018, 2022 ва 2026 йилларда майдонга тушган. Дарвозабон 2006 ва 2010 йиллардаги турнирларда ҳам Мексика терма жамоаси таркибида бўлган, аммо бирорта ўйинда иштирок этмаган.

Умуман олганда, Очоа Жаҳон чемпионатларида 12 та учрашув ўтказиб, уларнинг бештасида ўз дарвозаси дахлсизлигини сақлаб қолган.

Дарвозабон Мексика миллий терма жамоаси сафида 154 та ўйин ўтказган. У олти марта КОНКАКАФ Олтин кубогини қўлга киритган, шунингдек, 2021 йилги Токио Олимпиадасида бронза медали соҳиби бўлган.

Бу йил 41 ёшни қарши олган Очоа 2025 йилдан буён Кипрнинг АЕЛ клуби шарафини ҳимоя қилиб келаётган эди. Фаолияти давомида у Мексиканинг “Америка”, Испаниянинг “Малага” ва “Гранада”, Италиянинг “Салернитана”, Португалиянинг АВС, Франциянинг “Аяччо” ҳамда Бельгиянинг “Стандард” клубларида ҳам тўп сурган.