ОКМК-“Ас-Сиб” ўйини трансляцияси бўйича янгилик эълон қилинди

Бугун, 15 август куни Ўзбекистоннинг ОКМК клуби Осиё Чемпионлар лигаси (ОЧЛ) саралаш босқичи доирасида Уммоннинг “Ас-Сиб” жамоасига қарши баҳс олиб боради. ОФК талабларидаги номувофиқлик туфайли трансляция борасида муаммо юзага келди. Бу ҳақда футбол мутахассиси Алишер Никимбаев ўз Telegram саҳифасида маълум қилди.

Унинг фикрича, Ўзбекистон ҳудудидаги барча ОФК мусобақаларини трансляция қилиш ҳуқуқи бугунги ўйинни трансляция қилишдан манфаатдор бўлмаган Uzreport каналига тегишли. Бироқ Чемпионлар лигаси ва ОФК кубогининг саралаш босқичи ҳамда плей-офф ўйинларига барча тижорий ҳуқуқлар клублар ихтиёрида. Демак, трансляция масалаларини ОКМК клубининг ўзи ҳал қилади.

Бироз вақт ўтгач, Ўзбекистон Профессионал футбол лигаси (ЎзПФЛ) саҳифасида баҳс МТРК томонидан жонли эфирда намойиш этилиши маълум қилинди.

“Sport телеканали Олмалиқ шаҳрига ўз ишчи-гуруҳини юборади. Беллашув энг камида YouTube платформаси орқали жонли кўрсатилади. Мазкур баҳсни МТРК телеканали ёки бошқа иловалари орқали намойиш этилиши масаласи тез орада ҳал бўлиши мумкин”, дейилади ЎзПФЛ хабарида.

Маълумот учун, ОЧЛ саралашидан ўрин олган ОКМК-“Ас-Сиб” баҳси бугун соат 20:00 да бошланади. Учрашув ғолиби саралашнинг кейинги ўйинида Қатарнинг “Ал-Араби” жамоасига қарши майдонга тушади.