Оқ уй Аргентина футболчиларини қўллаб-қувватлади

Оқ уй Аргентина терма жамоаси футболчиларининг Англия устидан қозонилган Жаҳон чемпионати ярим финали ғалабасидан кейин мамлакатининг Фолкленд (Мальвин) оролларига бўлган даъвосини қўллаб-қувватловчи баннерни кўтарганини ҳимоя қилди. Бу ҳақда “The Guardian” хабар берди.

Аввалроқ Аргентина Англияни 2:1 ҳисобида мағлуб этган ўйиндан кейин айрим футболчилар “Las Malvinas son Argentinas” (“Мальвин ороллари Аргентинага тегишли”) деган ёзувли баннерни кўтаргани ҳақида хабар берилганди. Буюк Британия Бош вазири Кир Стармер кеча, 17 июль куни FIFA’ни мазкур ҳолатни текширишга чақириқларни қўллаб-қувватлаган ва 19 июль куни бўлиб ўтадиган финалда Испанияга омад тилашини билдирганди.

Бироқ Оқ уйнинг FIFA бўйича ишчи гуруҳи раҳбари Эндрю Жулиани Аргентина футболчиларини ҳимоя қилиб, АҚШда сўз эркинлиги кафолатланганини таъкидлаган. Унинг айтишича, Аргентина футболчилари АҚШда ўз фикрини билдириш имкониятига эга.

“Биз Америка Қўшма Штатларида Конституциянинг Биринчи тузатиши билан кафолатланган сўз эркинлиги ҳуқуқини қўллаб-қувватлаймиз”, деган Жулиани. 

Нашрга кўра, бу баёнот 20 июль куни Британия Бош вазири лавозимини эгаллаши кутилган Энди Бернэм учун ноқулай вазиятни юзага келтириши мумкин. Шунингдек, бугун, 18 июль куни Аргентинада регби бўйича Миллатлар чемпионати доирасида Англия ва Аргентина терма жамоалари ўзаро баҳс олиб боради. Англия жамоаси футболчилари ирқий ҳақоратлар бўлса, майдонни тарк этиш билан таҳдид қилган.

“Жаҳон чемпионати бизники бўлмаслиги мумкин, аммо Фолкленд ороллари аниқ бизники. Ҳукуматнинг позицияси ўзгармаган. Ўз тақдирини белгилаш ҳуқуқи орол аҳолисига тегишли ва Фолклендга бўлган садоқатимиз ҳеч қачон ўзгармайди”, деган Стармер матбуот котиби Бош вазирнинг муносабати ҳақида сўралганда.

У, шунингдек, FIFA кўриши мумкин бўлган чоралар ташкилот ваколатига киришини, аммо сиёсат футболга аралашмаслиги кераклигини таъкидлаган. Британия бизнес вазири Питер Кайл эса баннерни “футболда сиёсий фаолиятга йўл қўймаслик қоидаларининг қўпол бузилиши” деб атаган.

“Жаҳон чемпионатининг асосий тамойилларидан бири – сиёсат футболдан ажратилган бўлиши керак. Энди бу FIFA иши ва мен ташкилот бу ҳолатни синчиклаб текширишини кутаман”, деган у.

FIFA баёнотида эса интизом қўмитаси одатий тартибда ўйин ҳисоботларини ва тегишли ҳолатларни ўрганаётгани, шундан кейин FIFA интизом кодекси асосида кейинги чоралар юзасидан қарор қабул қилиниши маълум қилинган.

Маълумот учун, 2024 йилда Испания футболчилари Родри ва Альваро Мората Европа чемпионати ғалабасидан кейин “Гибралтар – Испанияники” деган шиорни айтгани учун UEFA томонидан бир ўйинга четлатилган эди.  

Фолкленд ороллари ҳукумати эса Аргентина футболчилари ҳаракатидан “афсусланганини, аммо ҳайратланмаганини” маълум қилган.

“1982 йилдаги босқин натижасида орол аҳолиси катта руҳий жароҳат олган. Шунинг учун Аргентина футболчилари кўтарган баннер Фолкленддаги кўплаб одамлар учун ўта ноўрин бўлди. FIFA спортни сиёсатдан холи сақлаш ҳақидаги ваъдасига амал қилиб, ўз қоидаларига мувофиқ бундай хатти-ҳаракатларга чора кўришига умид қиламиз”, дейилган баёнотда.

Фолкленд ороллари бўйича баҳс эса 1982 йилда Аргентина оролларга бостириб кирганидан кейин бошланган урушга сабаб бўлган. Ўшанда 900 дан ортиқ киши ҳалок бўлган.