Оҳангаронда поезд рельсдан чиқиб кетди (видео)

Кеча, 28 июль куни Тошкент вилоятининг Оҳангарон туманидаги Оҳангарон станциясида поезд рельсдан чиқиб кетди. Мазкур ҳолат юзасидан “Ўзбекистон темир йўллари” АЖ изоҳ берди.

Қайд этилишича, воқеа “АГМК Олмалиқ” шохобча йўлида, “ЛУКОЙЛ” шохобча йўлига тегишли стрелкали ўтказгичдан ўтиш вақтида содир бўлган.

Маълум қилинишича, Оҳангарон станциясида манёвр тепловози ва 4 та систерна вагон рельсдан чиққан. Ҳодиса оқибатида жабрланганлар йўқ, атроф-муҳитга зарар етмаган.

“Ўзбекистон темир йўллари” АЖ мазкур йўл компания тасарруфига кирмаслигини маълум қилган. Шунга қарамай, компания мутахассисларининг тавсиялари асосида шу куннинг ўзида вагонлар қайта изга туширилган.

Эслатиб ўтамиз, жорий йилнинг 19 июнь куни Туркиянинг Истанбул шаҳридаги Кадикўй ва Сабиха Гўкчен халқаро аэропорти ўртасида қатновчи M4 метро йўналишидаги поезд Бостанжи бекатида рельсдан чиқиб кетгани ҳақида хабар берилган эди.