Нетаньяху Трампнинг ҳузурида. У Ғазо бўйича Америка режасига рози бўлди

Кеча, 29 сентябрь куни АҚШ Президенти Дональд Трамп Исроил Бош вазири Биньямин Нетаньяхуни Оқ уйда қабул қилди. Бу ҳақда CNN телеканали хабар берди.

Америкалик етакчи Исроил ҳукумат раҳбарини кутиб олар экан Ғазо секторида яқин фурсатда тинчликка эришиш имконияти борлигига “жуда ишонишини” айтди. Трампнинг бу гаплари Бош вазир билан учрашувда янада очиқланиб борди. 

Икки мамлакат етакчиси учрашув давомида шак-шубҳасиз Ғазодаги масалаларни муҳокама қилган. 

Оқ уйнинг хабар беришича, Биньямин Нетаньяху билан учрашувда АҚШ Президенти тинчлик режасини якунлашни режалаштирган.

АҚШ режаси 21 банддан иборат бўлиб, учта асосий таркибий қисмларни ўз ичига олади: барча гаровдагиларни қайтариш, ҲАМАСнинг Исроилга таҳдидини тугатиш ва Ғазо учун гуманитар ёрдамни кўпайтириш. 

Нетаньяху бу борада Трампнинг таклифини қабул қилган.

Учрашувлар якунга етгандан сўнг, журналистлар Америка раҳбарига Ғазо секторида яқин орада ўт очишни тўхтатиш бўйича келишувга эришилиши ҳақида савол берган.

“Бу ҳақиқат. Мен бунга жуда ишонаман”, дея қисқа жавоб берган Оқ уй раҳбари. 

Эслатиб ўтамиз, жорий йилнинг 28 сентябрь куни АҚШ Президенти Дональд Трамп маъмурияти Ғазо бўйича 21 банддан иборат тинчлик режасини эълон қилганди. Унда ҲАМАС қўлида бўлган барча гаровдагилар келишув имзоланганидан 48 соат ўтмасдан озод этилиши ва уруш тугагач, Ғазо учун йўл харитаси ишлаб чиқилиши назарда тутилган.