Нетаньяху Эрон билан келишувга эришиш учун 4 та шартни айтди

Исроил Бош вазири Биньямин Нетаньяху Эрон билан тузиладиган келишув Қўшма Штатлар ва бутун дунё хавфсизлигини кафолатлайдиган қатъий талабларга жавоб бериши кераклигини айтди. Бу ҳақда Бош вазир кеча, 15 февраль куни Қуддусдаги Президентлар конференциясидаги нутқида  сўз очди.

“Агар биз келишувга эришмоқчи бўлсак, у бир қатор асосий элементларни ўз ичига олиши керак – бизнинг фикримизча, бу элементлар нафақат Исроил хавфсизлиги, балки Қўшма Штатлар, минтақа ва дунё хавфсизлиги учун ҳам жуда муҳимдир”, дейди Нетаньяху.

Исроил Бош вазири биринчи шарт сифатида Эрондан барча бойитилган уранни олиб чиқишни айтган. Иккинчи шартга кўра, Эрон бойитиш ускуналари ва инфратузилмасини тўлиқ демонтаж қилиши керак. Учинчиси – ракета дастурига тааллуқли: Теҳрон Ракета технологияларини назорат қилиш режимининг 300 километрлик чегарасига риоя қилиши керак. Тўртинчи шарт – Эрон жиддий шикастланган, аммо ҳали ҳам бор бўлган “террор ўқи” деб аталувчи тузилмасини тугатиши зарур.

Эслатиб ўтамиз, аввалроқ Биньямин Нетаньяху АҚШ Президенти Дональд Трамп билан учрашиб, Трампни Эроннинг нафақат уранни бойитишини тўхтатиш, балки баллистик ракета дастури ҳамда ҲАМАС ва “Ҳизбуллоҳ” каби гуруҳларни қўллаб-қувватлашини чекловчи кенг қамровли келишувга эришишга ундагани ҳақида хабар берилган эди.

Фарангиз Суннатова