НАТО вакиллари Прагада Украина масаласини кўриб чиқади

НАТО Ҳарбий қўмитаси жорий йилнинг 13-15 сентябрь кунлари Прагада бош штаб бошлиқлари йиғилиш ўтказади. Бу ҳақда ташкилот матбуот хизмати хабар берди.

Қайд этилишича, 2024 йил 13-15 сентябрь кунлари Прагада (Чехия) НАТОнинг Ҳарбий қўмитаси йиғилиши бўлиб ўтади. Учрашувда Мудофаа бошлиқлари альянс доирасидаги ҳарбий стратегик ўзгаришларни муҳокама қилади. Ҳарбий қўмита конференцияси очилишида Чехия Президенти Петр Павел иштирок этади.

Сессия уч босқичда бўлиб ўтиши режалаштирилган. Хусусан, биринчи сессияда 2024 йилнинг июль ойида Вашингтонда бўлиб ўтган саммитда иттифоқчи давлатлар ва ҳукумат раҳбарлари томонидан қабул қилинган қарорлар ижроси муҳокама қилинади.

“НАТО етакчилари жиловлаш ва мудофаани янада мустаҳкамлаш, Украинани узоқ муддатли қўллаб-қувватлашни кучайтириш ва глобал шерикликни чуқурлаштириш учун муҳим қадамлар қўймоқда”, дейилади баёнотда.

Иккинчи сессияда НАТОнинг Европадаги иттифоқчи қўшинлари олий қўмондони генерал Кристофер Каволи штаб бошлиқларига ҳужумни олдини олиш ва мудофаа режаларини амалга оширишдаги муваффақиятлар ҳақида маълумот беради.

Бундан ташқари, НАТОнинг Украинани қўллаб-қувватлаш пакетининг бир қисми унга хавфсизлик ёрдамини кўрсатиш, мувофиқлаштириш ва ташкил этиш учун кўриб чиқилади. Шунингдек, Украина учун NATO Хавфсизлик ва Таълим Қўмондонлигини (NSATU) яратиш ҳам муҳокама қилинади.

Учинчи сессияда ташкилотнинг Трансформация бўйича Олий қўмондони генерал Филип Лавин мудофаа режалаштириш жараёнига (NDPP) мувофиқ альянснинг жанговар операцияларини ўзгартириш ҳақида маъруза қилади.

Маълумот учун, Ҳарбий қўмита НАТОнинг Брюсселдаги штаб-квартирасида йилига икки марта Мудофаа бошлиқлари сессиясида йиғилади ва йилига бир марта Иттифоқчи аъзо давлат томонидан Конференция ўтказилади.