НАТО бир қарор учун АҚШга босим қилмоқда – ОАВ

АҚШ томонидан Украинага айрим қуролларни етказиб беришни тўхтатиш қарори учун НАТО иттифоқчилари Пентагонга босим ўтказмоқда. Бу ҳақда “Bloomberg” хабар берди.

Маълум қилинишича, Қўшма Штатларнинг ушбу қарори Украина расмийлари ва ҳатто АҚШ ичидаги сиёсатчиларни ҳайратга солиб қўйган. Қарор ҳатто АҚШ Давлат департаменти билан ҳам келишилмасдан қабул қилинган бўлиши мумкин.

Қайд этилишича, НАТО таркибидаги давлатлардан бир нечтаси ҳозирда АҚШ Мудофаа вазирлиги (Пентагон)га босим ўтказмоқда ва бу қарорни қайта кўриб чиқишни талаб қилмоқда. 

“Politico” ва NBC News нашрларининг хабар беришича, АҚШ Patriot ҳаво мудофаа тизими учун ракеталар каби баъзи қуролларни Украинага юборишни тўхтатган. Бу қарор июнь ойининг бошида Пентагон томонидан қабул қилинган, аммо яқинда кучга кирган. “Financial Times” эса айрим юклар йўлга чиққанидан сўнг тўхтатилганини билдирган.

Оқ уй бу қарорни тасдиқлаган ва “Американинг манфаатларини биринчи ўринга қўйиш” кераклигини таъкидлаган.

Шунингдек, Пентагон бу вақтинчалик тўхтатишни қувват захиралари ва мудофаа устуворликларини қайта кўриб чиқиш зарурати билан изоҳлаган. Давлат департаменти эса бу тўлиқ ҳарбий ёрдамни тўхтатиш эмаслигини айтган ва Киев қарордан хабарсиз қолган деган иддаоларни инкор этган. 

Украина Мудофаа вазирлиги қарор бўйича расмий билдиришнома олмаганини маълум қилган. Мамлакат Ташқи ишлар вазирлиги АҚШнинг Украинадаги муваққат вакили Жон Хинкелни чақирган. Президент Владимир Зеленский эса бу масалада Вашингтон билан аниқлаштириш олиб борилаётганини айтган.

Эслатиб ўтамиз, аввалроқ республикачи конгрессмен Брайан Фицпатрик Трампдан Украинага ҳарбий ёрдамнинг тўхтатилиши бўйича зудлик билан тушунтириш беришни талаб қилганди.