НАТО Беларусь биқинида ҳарбий машғулот ўтказди

Жорий йилнинг май ойида АҚШ ва Буюк Британия Литвада, Беларусь чегарасидан тахминан 30 километр узоқликда ҳарбий машғулотлар ўтказди. Бу ҳақда “Forbes” хабар берди.

Қайд этилишича, “Project Flytrap 5.0” номини олган ушбу маневрлар Шимолий Атлантика альянсига аъзо мамлакатлар ўртасида рақиб дронларига қарши курашиш самарадорлигини ошириш борасидаги узлуксиз саъй-ҳаракатлар доирасида, учувчисиз учиш аппаратларидан фойдаланган ҳолда уруш олиб бориш тактикасини синаб кўриш мақсадида ташкил этилган.

Ўтган йили бошланган ушбу машғулотлар НАТОнинг шарқий қанотда эҳтимолий душманларни тийиб туриш ҳамда шарқий чегараларни ҳимоя қилишга қаратилган ташаббусининг бир қисми ҳисобланади. 

“Тадбирлар дастлаб Германия ва Польшада бошланган бўлиб, кейинчалик “дронлар қўлланиладиган урушнинг тобора кенгаяётган кўламига мос келиш учун” аста-секин йирик миқёс касб этди”, дейилади хабарда.

АҚШ армиясининг 5-корпуси ҳамда АҚШнинг Европа ва Африкадаги Қуруқликдаги қўшинлари қўмондонлиги раҳбарлигида ўтган машғулотларнинг ушбу сўнгги босқичида Америка бўлинмалари эскадрилья даражасидаги дрон ҳужумларини қайтариш учун Буюк Британия ҳаво-десант қўшинларига қарши кураш олиб борган. Машғулот иштирокчилари 50 дан ортиқ инновацион ишланмаларни, жумладан, дронларга қарши тутувчи воситалар, датчиклар ва учувчисиз қуруқликдаги техникаларни синовдан ўтказган ҳамда жараёнда қатнашаётган ишлаб чиқарувчиларга техник воситалар бўйича тезкор фикр-мулоҳазаларини билдирган.

Машғулотларнинг навбатдаги босқичида қўшинлар сони бригада даражасигача оширилиши режалаштирилган.

Эслатиб ўтамиз, аввалроқ НАТО Руминия сўровига биноан мамлакат ҳудудига дрон келиб тушгани сабабли фавқулодда йиғилиш ўтказиши ҳақида хабар берилган эди.