“Натижа бор”. Путин Ар-Риёддаги музокараларга изоҳ берди

Россия Президенти Владимир Путин Россия ва АҚШ делегацияларининг Ар-Риёдда ўтказилган музокаралари якунлари бўйича ҳисобот олганини ва натижаларни ижобий баҳолаганини маълум қилди. Бу ҳақда “Коммерсанть” хабар берди.

Путиннинг сўзларига кўра, Россия биринчи қадамни қўйган ва АҚШ билан турли йўналишларда, жумладан, Яқин Шарқ бўйича ҳамкорликни тиклашга тайёр. Музокараларнинг асосий мақсади ўзаро ишончни ошириш бўлиб, у бўлмаса Украинадаги можарони ҳал қилиб бўлмайди.

“Ҳа, менга ҳисобот беришди. Мен натижаларни юқори баҳолайман. Ижобий натижа бор”, деди Путин.

Путиннинг сўзларига кўра, музокараларда АҚШ томонидан “бошқа одамлар” қатнашган – улар холис, ҳукм чиқаришга моил эмас ва ҳамкорликка очиқ бўлган. Шунингдек, у АҚШ Президенти Дональд Трамп билан учрашиш истагини билдирган, бироқ бу учрашув олдиндан тайёргарликни талаб қилиши, энг муҳим масалаларни муҳокама қилишга йўналтирилиши кераклигини қўшимча қилган.

“Биз дипломатик идоралар ишини нормал тарзда тиклашга келишиб олдик. Доимий равишда дипломатларни Вашингтон ва Москвадан чиқариб юбориш ҳеч қандай фойда келтирмайди. Агар иш шу тарзда давом этса, бу биноларда фақат тозаловчилар ишлайди. Албатта, уларнинг меҳнатини ҳам қадрлаш лозим, аммо дипломатик ваколатхоналар бундай мақсадда ташкил этилмайди”, деди Путин.

Путин музокараларда муҳокама қилинган бир қатор бошқа мавзуларни ҳам тилга олган, жумладан, иқтисодий ҳамкорлик, жаҳон энергетика бозорларида қўшма фаолият ва космик соҳадаги ҳамкорлик. Шунингдек, у стратегик ҳужум қуролларини қисқартириш бўйича янги шартнома (SNV-3) бўйича музокараларни давом эттириш зарурлигини эслатди.

“Бу масала ҳаммага унутилиб кетгандек туюлади, лекин мен эслатиб ўтаман: 2026 йил февралда SNV-3 шартномаси муддати тугайди”, деди Путин.

Эслатиб ўтамиз, 18 февраль куни Ар-Риёдда Россия ва АҚШ делегациялари ўртасида уруш бошланганидан буён илк бевосита музокаралар бўлиб ўтди. Музокаралар давомида томонлар урушни тўхтатиш ва икки томонлама муносабатларни яхшилаш бўйича мулоқотни давом эттиришга келишиб олди. Шу билан бирга, Россия Президенти ёрдамчиси Юрий Ушаков Москва ва Вашингтон позициялари яқинлашаётганини ҳозирча айтиш қийинлигини таъкидлаган. Кейинроқ, Владимир Путин журналистлар билан учрашувда Россия томони Украина можаросини ҳал қилиш учун музокаралар столига қайтишга тайёр эканини айтди. Унга кўра, Украина Россия ва АҚШ делегацияларининг Ар-Риёддаги учрашувида иштирок этмагани учун уларнинг “ажралиб” қолишига асос йўқ, чунки ҳеч ким Киевни музокаралар жараёнидан четлаштирмаяпти.